لاہور( پاک ترک نیوز) قومی کرکٹ ٹیم کے وکٹ کیپر بلے باز محمد رضوان آج نیشنل سائبر کرائم انویسٹی گیشن ایجنسی کے سامنے پیش ہوں گے۔
رضوان نے ادارے کو تیسرا خط لکھ کر دو اکتوبر کو تحقیقات میں شامل ہونے کی تحریری یقین دہانی کرادی ہے۔محمد رضوان نے خط میں کہا ہے کہ انہیں این سی سی آئی اے کا نوٹس موصول ہوگیا ہے اور وہ آج تحقیقات میں شامل ہونے کے لیے پیش ہوں گے، تاہم انہیں اب تک واضح طور پر یہ نہیں بتایا گیا کہ ان کے خلاف اصل الزام کیا ہے اور تحقیقات کا دائرہ کار کیا ہے۔
یہ بھی پڑھیں: پاکستان کی مدینہ منورہ کے قریب پاور اسٹیشن پر حملے کی مذمت ،سعودی عرب سے اظہار یکجہتی
رضوان کے مطابق پہلے نوٹس میں ان پر آن لائن بیٹنگ اور جوئے سے متعلق الزامات کا ذکر کیا گیا تھا، جبکہ عدالت میں کارروائی کے دوران الیکٹرانک فراڈ سے متعلق قانون کی دفعہ کا حوالہ دیا گیا۔ تاہم تازہ نوٹس میں آن لائن بیٹنگ یا جوئے کے الزامات کا ذکر نہیں کیا گیا۔قومی کرکٹر نے این سی سی آئی اے سے تحریری طور پر وضاحت طلب کی ہے کہ آیا موجودہ تحقیقات اب بھی آن لائن بیٹنگ یا جوئے کے معاملے سے متعلق ہیں یا تحقیقات کا دائرہ کار تبدیل کردیا گیا ہے۔ انہوں نے یہ بھی پوچھا ہے کہ الیکٹرانک جرائم کی روک تھام کے قانون دو ہزار سولہ کی کون سی مخصوص دفعات ان کے خلاف تحقیقات میں زیرِ غور ہیں۔
