اسلام آباد ( پاک ترک نیوز) پاکستان نے مدینہ منورہ کے قریب طیبہ پاور ڈسٹری بیوشن اسٹیشن پر حوثی ملیشیا کے حملے کی شدید مذمت کی ہے۔ترجمان دفتر خارجہ کے مطابق 29 ستمبر کو مدینہ منورہ کے طیبہ پاور ڈسٹری بیوشن اسٹیشن پر حوثی ملیشیا کا حملہ قابل مذمت ہے۔ترجمان کا کہنا ہے کہ مسجد نبوی ﷺ کو بجلی فراہم کرنے والے بنیادی ڈھانچے پر حملہ سنگین اشتعال انگیزی ہے، جو دنیا بھر کے کروڑوں مسلمانوں کے لیے گہری تشویش اور اضطراب کا باعث ہے۔پاکستان نے حرمین شریفین، نمازیوں اور زائرین کی سلامتی کے ہر حال میں احترام کو یقینی بنانے پر زور دیا ہے۔
یہ بھی پڑھیں: خلیجی و اسلامی ممالک کی مدینہ منورہ میں گرڈ اسٹیشن پر حملے کی شدید مذمت
ترجمان دفتر خارجہ کے مطابق پاکستان علاقائی امن و سلامتی کے لیے سنگین خطرہ بننے والی غیر ذمہ دارانہ کارروائیوں کے فوری اور غیر مشروط خاتمے کا مطالبہ کرتا ہے۔پاکستان نے برادر ملک سعودی عرب کے ساتھ غیر متزلزل یکجہتی کا اظہار کرتے ہوئے سعودی عرب کی خودمختاری، علاقائی سالمیت اور سلامتی کے لیے مکمل حمایت کا اعادہ کیا ہے۔ترجمان کے مطابق پاکستان حرمین شریفین کے تحفظ اور سعودی شہریوں و زائرین کی سلامتی یقینی بنانے کے لیے سعودی عرب کی کوششوں میں بھرپور ساتھ دینے کے عزم کا اظہار کرتا ہے۔دفتر خارجہ کا کہنا ہے کہ پاکستان خطے میں پائیدار امن و استحکام کے حصول کے لیے اپنی تمام تر کوششیں جاری رکھے گا۔
