ایرانی صدر کی گاڑی پانی ملے پٹرول سے خراب ، ٹیکسی میں سفر کرنا پڑ گیا

تہران (پاک ترک نیوز) ایران کے صدر مسعود پزشکیان کی گاڑی غیر معیاری پیٹرول کی وجہ سے خراب ہو گئی جس سے ان کو ٹیکسی میں سفر کرنا پڑ گیا۔
ایرانی صدر ایران کے شہر تبریز جا رہے تھے، اس دوران قافلے کی 3 گاڑیوں میں قزوین صوبے کے پیٹرول اسٹیشن سے پیٹرول ڈلوایا گیا۔
تاہم پانی ملے پیٹرول کے باعث گاڑیاں خراب ہو گئیں اور قافلہ درمیان میں رُک گیا جس کے بعد ایرانی صدر نے مقامی حکام کو اطلاع دیے بغیر خود ہی ایک ٹیکسی کے ذریعے تبریز پہنچے۔
اعلیٰ حکومتی عہدیدار نے بتایا کہ مذکورہ پیٹرول پمپ پانی ملا ناقص پیٹرول فراہم کر رہا تھا اور اس کے خلاف پہلے بھی اسی قسم کی خلاف ورزیوں کی شکایات درج ہو چکی ہیں۔