کھٹمنڈو(پاک ترک نیوز ) نیپال اور تبت میں آنے والے تباہ کن سیلاب اور لینڈ سلائیڈنگ کے باعث ہلاکتوں کی تعداد 543 تک پہنچ گئی، جبکہ 1500 سے زائد افراد تاحال لاپتہ ہیں۔
ذرائع کے مطابق لاپتہ افراد میں تقریباً 320 بھارتی شہری بھی شامل ہیں، جس کے باعث ہلاکتوں میں مزید اضافے کا خدشہ ظاہر کیا جا رہا ہے۔
نیپال میں شدید بارشوں کے بعد آنے والے سیلاب اور مٹی کے تودوں نے بڑے پیمانے پر تباہی مچائی ہے۔ کئی علاقے زیر آب آ گئے جبکہ متعدد عمارتیں اور راستے ملبے تلے دب گئے۔
نیپالی فوج اور امدادی اداروں کی جانب سے متاثرہ علاقوں میں ریسکیو آپریشن جاری ہے۔ امدادی کارکن کیچڑ اور پانی سے بھری سرنگوں، تباہ شدہ عمارتوں اور دیگر خطرناک مقامات میں پھنسے افراد کو نکالنے کی کوشش کر رہے ہیں۔
یہ بھی پڑھیں: وزیراعلیٰ مریم نواز کا نیپال میں سیلاب سے جانی و مالی نقصان پر اظہارِ افسوس
ریسکیو اہلکاروں کو دشوار گزار علاقوں اور مسلسل خراب موسم کے باعث شدید مشکلات کا سامنا ہے، تاہم لاپتہ افراد کی تلاش کا عمل جاری ہے۔
المناک حادثے پر عالمی برادری کی جانب سے افسوس اور ہمدردی کا اظہار کیا گیا ہے۔
دوسری جانب آسٹریلیا نے نیپال کے متاثرین کی امداد کے لیے 50 لاکھ ڈالر کے امدادی پیکج کا اعلان کیا ہے۔
امدادی سرگرمیوں کے ساتھ ساتھ متاثرہ علاقوں میں خوراک، طبی سہولیات اور دیگر ضروری سامان کی فراہمی بھی جاری ہے، جبکہ حکام نے مزید بارشوں اور لینڈ سلائیڈنگ کے خدشے کے پیش نظر شہریوں کو محتاط رہنے کی ہدایت کی ہے۔
