لاہور (پاک ترک نیوز )پاکستان کرکٹ بورڈ کے ڈائریکٹر ہائی پرفارمنس اور قومی سلیکشن کمیٹی کے رکن عاقب جاوید نے انگلینڈ کے خلاف ٹیسٹ سیریز میں قومی ٹیم کی شکست کی ذمہ داری کپتان بابر اعظم اور ہیڈ کوچ سرفراز احمد پر عائد کردی۔جیونیوز کے پروگرام ’’آج شاہ زیب خانزادہ کے ساتھ‘‘ میں گفتگو کرتے ہوئے عاقب جاوید نے ٹیم میں ہونے والی غیر معمولی تبدیلیوں پر کہا کہ بعض معاملات سلیکٹرز کی ذمہ داری ہیں اور وہ اسکواڈ کی ذمہ داری لینے کو تیار ہیں۔
عاقب جاوید کے مطابق دورے کے دوران مطلوبہ ٹیم کمبی نیشن تشکیل نہیں دیا جا رہا تھا، اس حوالے سے ان کی کپتان بابر اعظم اور کوچ سرفراز احمد سے بھی بات ہوئی۔انہوں نے کہا کہ جب کوچ اور کپتان فیصلے نہیں کر پا رہے ہوں تو کسی نہ کسی کو ایکشن لینا پڑتا ہے، دنیا ہم پر اس لیے ہنس رہی ہے کیونکہ ہم مقابلہ ہی نہیں کر پا رہے۔
عاقب جاوید کا کہنا تھا کہ حالیہ تبدیلیوں سے ٹیم کو واضح پیغام جائے گا کہ پلاننگ کے مطابق پلیئنگ الیون تشکیل دینا کپتان، کوچ اور مینجمنٹ کی بھی ذمہ داری ہے۔خیال رہے کہ انگلینڈ کے خلاف تین ٹیسٹ میچز کی سیریز میں پاکستان ابتدائی دو میچز میں شکست کھا چکا ہے۔
یہ بھی پڑھیں: ویمن ٹی20 ایشیا کپ: پاکستان نے تھائی لینڈ کو 35 رنز سے شکست دے دی
پی سی بی نے سیریز کے دوران ہی ہیڈ کوچ، بولنگ کوچ اور 7 کھلاڑیوں کو اسکواڈ سے ریلیز کردیا ہے۔
