از: سہیل شہریار
پاکستان کی خدمات کی برآمدات میں2025-26کی پہلی ششماہی جولائی تا دسمبرمیں گزشتہ سال کی اسی مدت کے مقابلے میں 16.51 فیصد اضافہ ہوا۔ جس کی بڑی وجہ انفارمیشن ٹیکنالوجی کے شعبے سے حاصل ہونے والی زیادہ آمدنی ہے۔
پاکستان ادارہ شماریات کے اعداد و شمار کے مطابق، خدمات کی برآمد رواں مالی سال 2026 کے پہلے نصف حصے میں 4.764 ارب ڈالر تک پہنچ گئی ہے جو پچھلے سال کی اسی مدت میں 4.089 ارب ڈالر تھی۔خدمات کی برآمدات کے ماہانہ رجحانات سے پتہ چلتا ہے کہ جولائی میں سال بہ سال 18.27 فیصد اضافہ ہوا۔ اس کے بعد اگست میں 8.41 فیصد، ستمبر میں 14.85 فیصد، اکتوبر میں 17.61 فیصد، نومبر میں 22.26 فیصد اور دسمبر میں 15.94 فیصد اضافہ ہوا۔ خدمات کی برآمد میں اضافہ بنیادی طور پرٹیلی کمیونیکیشن، کمپیوٹر اور انفارمیشن سروسز کےشعبوں میں ہوا ہے۔جبکہ صرف آئی ٹی سیکٹر نے جولائی تا دسمبر میں 16.51 فیصد اضافہ ریکارڈ کیا ہے۔
روپے کے لحاظ سے خدمات کی برآمدات 18.04فیصد اضافے سے مالی سال 2026 کے پہلے نصف میں 1.342کھرب روپے تک بہتر ہوئیں۔جبکہ گذشتہ مالی سال 2025 کے اسی عرصے میں 1.137کھرب روپےتھیں۔
اعداد وشمار کے مطابق خدمات کی برآمدات میں فروری 2024سے شروع ہونے والا اضافے کا سلسلہ تسلسل کے ساتھ جاری ہے ۔اور رواں مالی سال میں خدمات کی برآمدات میںنمایاں اضافہ ہو رہا ہے۔چنانچہ صرف دسمبر میں خدمات کی برآمدات 93 کروڑ 51 لاکھ ڈالر تک پہنچ گئیں جو پچھلے سال کے اسی مہینے میں 80کروڑ66 لاکھ ڈالر تھیں۔یوں ماہانہ تقابل میںیہ اضافہ 15.94 فیصد کی نمو کو ظاہر کرتاہے۔
مالی سال 2024 میں پاکستان سے خدمات کی برآمدات 7.68 ارب ڈالر تھیں۔ جو گزشتہ مالی سال 2025 میں 9.23 فیصد بڑھ کر 8.39 ارب ڈالر تک پہنچ گئیں۔ خدمات کی برآمدات میں اضافے کی بنیادی وجہ انفارمیشن ٹیکنالوجی اور دیگر کاروباری برآمدات میں اضافہ ہے۔ تاہم اسی دوران صرف ایک مہینے ا گست 2024 میں 6.50 فیصد کمی واقع ہوئی تھی۔
اسٹیٹ بینک آف پاکستان کے مرتب کردہ اعداد و شمار کے مطابق جاری مالی سال 26 میںجولائی تا دسمبر چھ ماہ میں ٹیلی کمیونیکیشن، کمپیوٹر اور انفارمیشن سروسز کی برآمدات 19.82 فیصد اضافے کے ساتھ 2.236 ارب ڈالر تک پہنچ گئیں جو کہ گزشتہ سال کے اسی عرصے میں 1.866 ارب ڈالر تھیں۔
دوسری کاروباری خدمات کی برآمدات میں 24.87فیصداضافہ ریکارڈ کیا گیا جو مالی سال 2026 کے پہلے نصف میں 1.014 ارب ڈالر تک پہنچ گئیں۔جبکہ گزشتہ سال کے اسی عرصے میں انکی مالیت 81کروڑ 20لاکھ ڈالر تھی۔ ان خدمات میں ٹرانسپورٹ سروسز کی برآمدات مالی سال 26 میں 0.44 فیصد بڑھ کر46 کروڑ 20لاکھ ڈالر، ٹریول سروسز کی ایکسپورٹ19.49فیصدبڑھ کر42کروڑ90لاکھ ڈالر ہو گئی۔
دوسری جانب ملک میں خدمات کی درآمدات میں بھی نمایاں اضافہ ہو رہا ہےاور یہ رواں مالی سال 2026کی پہلی ششماہی میں 6.504ارب ڈالر تک پہنچ گئی ہیں۔ جو گزشتہ سال کے اسی عرصے میں 5.619ارب ڈالر تھیں۔ یوں ماہانہ بنیادوں پر خدمات کی درآمد میں 34.39 فیصد اضافہ ہوا ہے۔
