اسلام آباد:(پاک ترک نیوز)اسٹیٹ بینک آف پاکستان نے نئے ڈیزائن کے پاکستانی روپے کے کرنسی نوٹس کے اجرا کے لیے تمام ابتدائی تیاریاں مکمل کر لی ہیں، تاہم اس عمل کو آگے بڑھانے کے لیے وفاقی کابینہ کی منظوری کا انتظار کیا جا رہا ہے۔
پاکستان سیکیورٹی پرنٹنگ کارپوریشن (پی ایس پی سی) کے مطابق نئے کرنسی نوٹس جدید اور مزید مضبوط سیکیورٹی فیچرز سے لیس ہوں گے۔ تاہم حتمی ڈیزائن ابھی تک باضابطہ طور پر پرنٹنگ کے لیے موصول نہیں ہوئے، جس کی ایک قومی اخبار نے تصدیق کی ہے۔
ذرائع کے مطابق جیسے ہی وفاقی کابینہ کی منظوری ملے گی، نئے نوٹس کی چھپائی کے عمل میں کم از کم دو ماہ لگیں گے۔پی ایس پی سی کے سینئر مینیجر پرنٹنگ، امیر شمس نے بتایا کہ اسٹیٹ بینک اور پاکستان سیکیورٹی پرنٹنگ کارپوریشن کے درمیان نئے کرنسی نوٹس کی پرنٹنگ سے متعلق مشاورت مکمل ہو چکی ہے۔
ان کے مطابق اسٹیٹ بینک اس بات پر غور کر رہا ہے کہ نئے ڈیزائن کے نوٹس مرحلہ وار جاری کیے جائیں یا تمام مالیتوں کے نوٹس ایک ساتھ متعارف کرائے جائیں۔
اسٹیٹ بینک کی جانب سے کرنسی نوٹس کی چھپائی کا باضابطہ شیڈول بعد میں جاری کیا جائے گا۔اگر وفاقی کابینہ نے منظوری دے دی تو نئے کرنسی نوٹس رواں سال کے آخر تک جاری کیے جانے کا قوی امکان ہے۔
ADVERTISEMENT
نئے کرنسی نوٹ کب آئیں گے؟ اسٹیٹ بینک نے ممکنہ تاریخ بتا دی
