بابر اعظم کی ٹی ٹونٹی ٹیم میں واپسی کے امکان

لاہور( پاک ترک نیوز) قومی کرکٹ ٹیم کے سابق کپتان اور سٹار بیٹر بابر اعظم کی ٹی ٹوئنٹی ٹیم میں واپسی متوقع ہے۔
بابر اعظم کو جنوبی افریقہ کے خلاف آئندہ ٹی ٹونٹی سیریز کے لیے دوبارہ ٹیم میں شامل کیے جانے کا امکان ہے۔بدلتی صورتحال نے جنوبی افریقہ کے خلاف سیریز میں بابر اعظم کی واپسی کے امکانات روشن بنا دیے ہیں۔ بیٹنگ لائن کی مسلسل ناکامی کے بعد ایک سینئر بلے باز کی کمی شدت سے محسوس کی جا رہی ہے۔
بابر اعظم نے آخری بار دسمبر میں جنوبی افریقہ کے خلاف ٹی ٹوئنٹی انٹرنیشنل میچ کھیلا تھا۔ اس کے بعد انہیں ٹیم سے باہر رکھا گیا، جس کی بڑی وجہ ان کا سٹرائیک ریٹ قرار دیا گیا۔ اس وقت چیف سلیکٹر عاقب جاوید اور ہیڈ کوچ مائیک ہیسن کا ماننا تھا کہ بابر اعظم جیسیے سینیئرز کے بجائے نوجوان کھلاڑیوں کو موقع دینا چاہیے۔
تاہم بھارت کے خلاف حالیہ دو شکستوں کے بعد پاکستان کرکٹ بورڈ نے بابر اعظم کو دوبارہ ٹیم میں شامل کرنے کی ہدایات دی ہیں۔
چند روز قبل بابر اعظم کو ایشیا کپ کے لیے دبئی بھیجنے پر غور بھی کیا گیا، لیکن ٹورنامنٹ کے منتظمین نے واضح کر دیا کہ سکواڈ میں صرف کسی کھلاڑی کے زخمی ہونے کی صورت میں ہی تبدیلی ممکن ہے۔
سلمان علی آغا بھی نشانے پر آ سکتے ہیں، بطور کپتان اور کھلاڑی ان کے مستقبل کا فیصلہ ایشیا کپ کے بقیہ میچوں میں ان کی کارکردگی طے کرے گی۔
اگر محمد حارث کی فارم بدستور خراب رہی، تو وکٹ کیپنگ کے فرائض بھی دوبارہ محمد رضوان کو سونپے جا سکتے ہیں۔
تاہم یہ بھی تک یہ طے نہیں ہوا کہ واپسی کے بعد بابر اعظم اوپنر کے طور پر کھیلیں گے یا نمبر تین یا چار پر بیٹنگ کریں گے۔
بابر اعظم نے کئی شاندار ریکارڈز اپنے نام کر رکھے ہیں۔ ان میں سب سے کم اننگز میں 5 ہزار ون ڈے رنز مکمل کرنے کا اعزاز ہے۔
اس کے علاوہ وہ ٹی ٹونٹی انٹرنیشنلز میں سب سے زیادہ نصف سنچریاں، اور سب سے زیادہ مجموعی اسکور کرنے والے کھلاڑیوں میں دوسرے نمبر پر ہیں۔
بابر اعظم واحد پاکستانی کپتان ہیں جنہوں نے قومی ٹیم کو ٹی ٹونٹی فارمیٹ میں دنیا کی نمبر ون ٹیم ہونے کا اعزاز دلایا۔