کراچی ( پاک ترک نیوز) پاکستان انٹرنیشنل ایئرلائنز نے نجکاری کے بعد اپنے فضائی بیڑے میں توسیع کا اہم فیصلہ کرلیا۔ پی آئی اے نے دو نئے طیارے فوری طور پر ویٹ لیز پر حاصل کرنے کی منظوری دے دی، دونوں طیارے اکتوبر میں پی آئی اے کے بیڑے کا حصہ بننے کا امکان ہے۔
رپورٹ کے مطابق پی آئی اے کے بورڈ آف ڈائریکٹرز نے ایئرلائن کی نجکاری کے بعد ہونے والے پہلے اجلاس میں دو نئے طیاروں کو بیڑے میں شامل کرنے کی منظوری دی۔
دونوں طیارے ابتدائی طور پر 6 ماہ کی ویٹ لیز پر حاصل کیے جائیں گے اور اکتوبر میں پی آئی اے کے فضائی بیڑے میں شامل ہونے کی توقع ہے۔
ذرائع کے مطابق نئے طیاروں کو بنیادی طور پر یورپ کے لیے پروازوں میں استعمال کیا جائے گا، جس سے پی آئی اے کی بین الاقوامی آپریشنل صلاحیت میں اضافہ ہوگا۔
ویٹ لیز کے معاہدے کے تحت لیز فراہم کرنے والی کمپنی صرف طیارہ ہی نہیں بلکہ اس کے پائلٹس اور کیبن کریو بھی فراہم کرتی ہے، جس سے پی آئی اے کو فوری طور پر طیاروں کو آپریشن میں شامل کرنے میں مدد ملے گی۔
یہ بھی پڑھیں: جولائی میں ترسیلاتِ زر 3 ارب 60 کروڑ ڈالر ریکارڈ
دو نئے طیاروں کی شمولیت سے پی آئی اے کی پروازوں کی آپریشنل صلاحیت بڑھنے اور آمدنی میں اضافے کی توقع ہے، جبکہ یورپ سمیت بین الاقوامی روٹس پر فضائی آپریشن مزید بہتر بنانے میں بھی مدد ملے گی۔
ذرائع کے مطابق یہ دونوں طیارے بوئنگ کے ساتھ پی آئی اے کی مزید 16 طیارے خریدنے کے لیے جاری بات چیت سے الگ ہیں۔پی آئی اے حکام نے گزشتہ ماہ امریکا میں بوئنگ کے ہیڈکوارٹرز کا دورہ بھی کیا تھا، جہاں 16 طیاروں کی ممکنہ خریداری پر بات چیت کی گئی۔
