لاہور( پاک ترک نیوز) ٹاؤن شپ تھانے میں گرفتار دو خواتین کی ہلاکت کے واقعے میں اہم پیش رفت سامنے آگئی، پولیس کو دونوں خواتین کی پوسٹ مارٹم رپورٹ موصول ہوگئی۔
پولیس ذرائع کے مطابق پوسٹ مارٹم رپورٹ میں دونوں خواتین کی موت کو طبعی قرار دیا گیا ہے، جبکہ جسم پر تشدد کے کوئی نشانات بھی نہیں ملے۔ذرائع کے مطابق پوسٹ مارٹم رپورٹ میں دونوں خواتین کی موت کی وجہ ہارٹ اٹیک بتائی گئی ہے۔
17 سالہ آمنہ اور 22 سالہ انمول کو 4 اگست کو چوری اور دھوکہ دہی کے الزامات کے تحت درج مقدمے میں گرفتار کرکے لاہور کے ٹاؤن شپ تھانے منتقل کیا گیا تھا۔
پولیس کے مطابق تھانے لائے جانے کے ابتدائی چند گھنٹوں میں ہی دونوں خواتین کی طبیعت خراب ہوگئی، جنہیں فوری طور پر ہسپتال منتقل کیا گیا، تاہم دونوں جانبر نہ ہوسکیں۔
اہلخانہ کے مطابق آمنہ اور انمول آپس میں نند اور بھابھی تھیں۔خواتین کے اہلخانہ پولیس پر تشدد کا الزام عائد کرتے رہے ہیں، تاہم لاہور پولیس نے تشدد کے الزام کو مسترد کیا ہے۔
پولیس کا مؤقف ہے کہ دونوں خواتین منشیات کی عادی تھیں اور ان کی موت مبینہ طور پر نشے کی زیادہ مقدار استعمال کرنے کے باعث ہوئی۔
یہ بھی پڑھیں: پی آئی اے کے بیڑے میں 2 نئے طیارے شامل کرنے کی منظوری
دوسری جانب ورثاء کا کہنا ہے کہ انہیں تاحال پوسٹ مارٹم رپورٹ فراہم نہیں کی گئی۔
پولیس کے مطابق دونوں خواتین کی ہلاکت 4 اگست کو ہی ہوئی تھی، جبکہ دو روز قبل پاکپتن کے علاقے میں دونوں کی تدفین کردی گئی۔
