ٹوکیو(پاک ترک نیوز) امریکا کے جدید جنگی طیارے ایف 15 ای ایکس ایگل ٹو پہلی بار مستقل تعیناتی کے لیے جاپان کے کادینا ایئر بیس پہنچ گئے، جہاں انہیں کئی دہائیوں پرانے ایف 15 طیاروں کی جگہ تعینات کیا جائے گا۔امریکی فضائیہ کے مطابق اتوار کو 18 ویں ونگ نے تصدیق کی کہ جدید الیکٹرانک جنگی نظام سے لیس پہلا ایف 15 ای ایکس طیارہ کادینا ایئر بیس پہنچ گیا ہے۔ یہ بیرون ملک کسی امریکی فوجی اڈے پر اس جدید طیارے کی پہلی مستقل تعیناتی ہے۔
نئے جنگی طیارے 67 ویں فائٹر اسکواڈرن کے زیر استعمال ہوں گے۔ طیاروں کی آمد سے قبل امریکی فضائیہ کے پائلٹس اور عملے نے امریکا میں خصوصی تربیت مکمل کی تھی۔67 ویں فائٹر اسکواڈرن کے کمانڈر لیفٹیننٹ کرنل اجے دوا کے مطابق ایف 15 ای ایکس کی کادینا آمد صرف آغاز ہے، اب توجہ طیاروں کو فضائی آپریشنز میں شامل کرنے، اسکواڈرن کی مہارت بڑھانے اور ان کی جدید صلاحیتوں سے بھرپور فائدہ اٹھانے پر مرکوز ہوگی۔امریکی فضائیہ کادینا ایئر بیس پر مجموعی طور پر 36 ایف 15 ای ایکس جنگی طیارے مستقل تعینات کرنے کا منصوبہ رکھتی ہے۔ یہ طیارے 67 ویں اور 44 ویں فائٹر اسکواڈرن کے زیر استعمال ہوں گے۔
رپورٹ کے مطابق کادینا ایئر بیس پر پہلے سے موجود ایف 15 سی اور ایف 15 ڈی طیارے کئی دہائیوں پرانے ہوچکے تھے، جس کے باعث امریکی فضائیہ نے چار سال قبل انہیں مرحلہ وار تبدیل کرنے کا منصوبہ شروع کیا تھا۔اس دوران خطے میں امریکی فضائی طاقت برقرار رکھنے کے لیے ایف 15، ایف 22 اور ایف 35 جنگی طیاروں کے مختلف دستے عارضی طور پر جاپان بھیجے جاتے رہے۔ جدید طیاروں کی آمد کے باوجود یہ عارضی تعیناتیاں جاری ہیں۔ایف 15 ای ایکس ایگل ٹو جدید الیکٹرانک جنگی نظام، بہتر فضائی نگرانی کی صلاحیتوں، جدید ایویونکس اور زیادہ ہتھیار لے جانے کی استعداد کا حامل ہے۔
یہ بھی پڑھیں: مائیکروسافٹ کی ونڈوز صارفین کے لیے بری خبر، نومبر سکیورٹی اپ ڈیٹس کے بعد ایکٹیویشن میں خرابی سامنا
امریکی فضائیہ کے مطابق یہ خصوصیات دشمن کے جنگی طیاروں کے خلاف کارروائی اور فضائی برتری برقرار رکھنے کی صلاحیت میں اضافہ کریں گی۔18 ویں ونگ کے کمانڈر بریگیڈیئر جنرل جان گالمور کے مطابق ایف 15 ای ایکس کی کادینا آمد بحرالکاہل میں امریکی فضائی طاقت کے لیے اہم سنگ میل ہے۔ ان کا کہنا تھا کہ نئے طیارے ممکنہ خطرات کا جواب دینے، جارحیت روکنے اور اتحادیوں کے ساتھ مل کر جاپان کے دفاع کو مضبوط بنانے میں مدد دیں گے۔
امریکی فضائیہ کے مطابق جدید جنگی طیاروں کی مستقل موجودگی امریکا اور جاپان کے دفاعی اتحاد کو مزید مضبوط بنانے کی کوششوں کا حصہ ہے۔












