واشنگٹن ( پاک ترک نیوز) امریکی جیوری نے معروف ٹیکنالوجی کمپنی ایپل کو پیٹنٹ کی خلاف ورزی کے مقدمے میں پانچ ارب ستر کروڑ ڈالر سے زائد ادا کرنے کا حکم دے دیا۔امریکی جیوری کے مطابق ایپل کے آئی فون اور ایپل واچ میں استعمال ہونے والی ٹیپٹک انجن ٹیکنالوجی نے سان ڈیاگو کی کمپنی ٹیکشن کے دو پیٹنٹس کی خلاف ورزی کی۔ٹیپٹک انجن صارف کو فون یا گھڑی میں ہلکی تھرتھراہٹ اور چھونے کا احساس فراہم کرتا ہے۔ٹیکشن نے یہ مقدمہ 2021 میں دائر کیا تھا۔ کمپنی کا مؤقف تھا کہ ایپل نے اس کی پیٹنٹ شدہ ٹیکنالوجی کو اپنی مصنوعات میں استعمال کیا، جبکہ ایپل نے الزامات مسترد کرتے ہوئے پیٹنٹس کو ہی غیر مؤثر قرار دیا تھا۔
یہ بھی پڑھیں: سوشل میڈیا سے کمائی کرنے والوں کے لیے بڑا جھٹکا
ایپل نے فیصلے پر ردعمل دیتے ہوئے کہا کہ اس کا ٹیپٹک انجن ٹیکشن کی ٹیکنالوجی سے بنیادی طور پر مختلف ہے اور کمپنی اس فیصلے کے خلاف اپیل کرے گی۔ٹیکشن کے وکیل نے جیوری کے فیصلے کا خیرمقدم کرتے ہوئے کہا کہ فیصلے سے کمپنی کے پیٹنٹ حقوق کی توثیق ہوئی ہے۔
