بغداد ( پاک ترک نیوز) عراق نے تیل پیدا کرنے والے ممالک کی تنظیم اوپیک کی قیادت سے مستقبل کے پیداواری کوٹے کے لیے تیل پیداوار کی بنیاد میں بڑے اضافے کا مطالبہ کردیا۔ذرائع کے مطابق بغداد نے مطالبہ کیا ہے کہ مستقبل میں عراق کے تیل پیداواری کوٹے کا تعین روزانہ 60 لاکھ بیرل کی پیداوار کو بنیاد بنا کر کیا جائے۔یہ مقدار عراق کی موجودہ پیداوار کے مقابلے میں نمایاں طور پر زیادہ ہے۔ اگست میں عراق کی روزانہ اوسط خام تیل پیداوار تقریباً 33 لاکھ 70 ہزار بیرل رہی، جو جولائی کی 27 لاکھ 70 ہزار بیرل روزانہ پیداوار سے کہیں زیادہ تھی۔
عراقی حکومت نے تیل کی پیداوار میں مزید بڑے اضافے کا منصوبہ بھی بنایا ہے۔ عراق کے وزیراعظم کے مطابق ملک آئندہ چھ برس کے دوران روزانہ 80 لاکھ سے ایک کروڑ بیرل تک تیل پیداوار بڑھانے کی کوشش کرے گا۔جنگ سے پہلے عراق تقریباً 40 لاکھ بیرل یومیہ تیل پیدا کررہا تھا، تاہم خطے میں جاری جنگ اور آبنائے ہرمز کی صورتحال نے عراقی تیل کی پیداوار اور برآمدات کو شدید متاثر کیا ہے۔
یہ بھی پڑھیں: سعودی عرب کا ترکیہ کے ففتھ جنریشن کان فائٹر جیٹ پروگرام میں شمولیت پرغور
عراق ان ممالک میں شامل ہے جو آبنائے ہرمز کی بندش سے سب سے زیادہ متاثر ہوئے۔ یہ آبی راستہ عراق کی خام تیل برآمدات کے لیے تاریخی طور پر انتہائی اہم رہا ہے۔
