اسلام آباد(پاک ترک نیوز) چیئرمین پاکستان تحریک انصاف بیرسٹر گوہر نے کہا ہے کہ تحریک انصاف پُرامن ہے اور اپنے حقوق کے لیے آئینی و سیاسی جدوجہد جاری رکھے گی، اداروں یا اسلام آباد پر حملہ نہیں کیا جائے گا۔
میڈیا سے گفتگو کرتے ہوئے بیرسٹر گوہر نے کہا کہ حکومت ہماری بات سنے اور انصاف فراہم کرے، ہم بارہا کہہ چکے ہیں کہ ہماری بات نہیں سنی گئی اور ہمیں انصاف نہیں ملا۔
انہوں نے کہا کہ وزرا چاہے جو بیانات دیں، کسی حکومتی وزیر نے یہ نہیں کہا کہ تحریک انصاف کا مؤقف سنا گیا یا اسے انصاف فراہم کیا گیا۔ پارٹی نے اپنے احتجاج کا پروگرام پہلے ہی اعلان کر رکھا ہے اور اس میں کوئی تبدیلی نہیں کی گئی۔
بیرسٹر گوہر نے وزیراعلیٰ خیبرپختونخوا سہیل آفریدی پر اعتماد کا اظہار کرتے ہوئے کہا کہ وہ ہمارے وزیراعلیٰ ہیں، بانی پی ٹی آئی کو بھی ان پر اعتماد ہے اور وہی وزیراعلیٰ رہیں گے۔ سہیل آفریدی کو پارٹی کی مکمل حمایت حاصل ہے اور یہ بانی پی ٹی آئی کی ہدایات ہیں۔
چیئرمین پی ٹی آئی نے حکومت پر زور دیا کہ وہ سیاسی جماعت کو سیاسی میدان سے باہر کرنے کے تاثر سے گریز کرے۔ ان کا کہنا تھا کہ اگر بڑی سیاسی جماعت کو سیاسی میدان سے نکالنے کی کوشش کی گئی تو اس کے خطرناک نتائج برآمد ہوسکتے ہیں۔
