انقرہ (پاک ترک نیوز)ترک صدر رجب طیب اردوان نے غزہ میں اسرائیلی فوجی کارروائیوں کو نہ صرف نسل کشی بلکہ ماحولیاتی تباہی بھی قرار دے دیا۔
ترکیہ کے شہر انطالیہ میں اقوام متحدہ کی موسمیاتی کانفرنس کوپ 31 سے خطاب کرتے ہوئے اردوان نے کہا کہ غزہ میں جو کچھ ہوا، وہ صرف نسل کشی نہیں بلکہ ’’ایکو سائیڈ‘‘ بھی ہے، یعنی ماحول اور قدرتی وسائل کی بڑے پیمانے پر تباہی۔
ترک صدر کے مطابق غزہ میں صدیوں پرانے زیتون کے درخت کاٹ دیے گئے، زمین اور پانی آلودہ ہوگئے جبکہ شہر ملبے کے بڑے ڈھیروں میں تبدیل ہوچکے ہیں۔
انہوں نے کہا کہ تباہ شدہ بنیادی ڈھانچے کے باعث شدید بارشوں اور سیلاب نے فلسطینیوں کی مشکلات مزید بڑھا دی ہیں، ہزاروں خیمے اور عارضی پناہ گاہیں پانی میں ڈوب چکی ہیں۔
اردوان نے اسرائیلی حکومت سے فلسطینی علاقے میں انسانی امداد کی رسائی بڑھانے کا بھی مطالبہ کیا۔
دوسری جانب اسرائیلی وزارت خارجہ نے سوشل میڈیا پلیٹ فارم ایکس پر ردعمل دیتے ہوئے اردوان پر اسرائیل مخالف مہم کے لیے عالمی فورم استعمال کرنے اور حماس کی حمایت کرنے کا الزام عائد کیا۔
اسرائیلی بیان میں کہا گیا کہ غزہ کی تعمیر نو کے خواہش مند افراد کو حماس سے ہتھیار ڈالنے کا مطالبہ کرنا چاہیے۔
یہ بھی پڑھیں: پاکستانی خلا باز کا چین کے خلائی اسٹیشن پر تاریخی مشن، بھارتی سائنس دان بھی چین کے تعاون کے معترف
واضح رہے کہ اسرائیل نے 7 اکتوبر 2023 کو حماس کے حملوں کے بعد غزہ میں فوجی کارروائی شروع کی تھی۔ ان حملوں میں اسرائیلی حکام کے مطابق تقریباً 1,200 افراد ہلاک اور 251 کو یرغمال بنایا گیا تھا۔
