اسلام آباد: (پاک ترک نیوزملک کے شمالی اور بالائی علاقوں میں شدید برفباری اور سرد موسم نے معمولاتِ زندگی کو شدید متاثر کر دیا ہے۔
آزاد کشمیر، خیبرپختونخوا اور گلگت بلتستان کے کئی اضلاع میں مسلسل برفباری کے باعث اہم رابطہ سڑکیں بند، بجلی کی فراہمی معطل اور متعدد علاقوں کا زمینی رابطہ منقطع ہو گیا ہے۔
مقامی ذرائع کے مطابق بعض علاقوں میں کئی فٹ تک برف جمع ہو چکی ہے، جس کی وجہ سے شہریوں اور سیاحوں کو شدید مشکلات کا سامنا ہے۔ مختلف مقامات پر لینڈ سلائیڈنگ اور برفانی تودے گرنے کے واقعات بھی سامنے آئے ہیں، جس سے صورتحال مزید پیچیدہ ہو گئی ہے۔
آزاد کشمیر کے پہاڑی علاقوں میں برفباری کے باعث درجنوں گاڑیاں راستوں میں پھنس گئیں، جن میں خواتین اور بچوں سمیت متعدد افراد موجود تھے۔
اطلاع ملتے ہی پاک فوج اور سول اداروں نے مشترکہ ریسکیو آپریشن شروع کیا اور پھنسے ہوئے افراد کو بحفاظت محفوظ مقامات پر منتقل کیا گیا۔مظفرآباد اور وادی نیلم میں کئی سال بعد ہونے والی برفباری سے سردی کی شدت میں غیر معمولی اضافہ ہوا ہے، جبکہ بعض دیہات میں مکانات کو جزوی نقصان پہنچنے کی اطلاعات ہیں۔
خوش قسمتی سے کسی بڑے جانی نقصان کی تصدیق نہیں ہوئی۔دوسری جانب خیبرپختونخوا کے بالائی اضلاع میں بھی وقفے وقفے سے برفباری جاری ہے۔ وادی کاغان، کمراٹ، دیربالا اور لواری ٹنل میں سڑکیں بند ہونے کے باعث آمدورفت معطل ہے، جس کے پیش نظر ضلعی انتظامیہ نے سیاحوں کے داخلے پر پابندی عائد کر دی ہے۔
گلگت بلتستان میں صورتحال مزید سنگین بتائی جا رہی ہے، جہاں شاہراہ قراقرم کئی مقامات پر بند ہونے سے مسافر اور مال بردار گاڑیاں پھنس گئی ہیں۔ استور، ہنزہ اور نگر میں بھی شدید برفباری کے باعث روزمرہ زندگی مفلوج ہو چکی ہے اور بعض علاقوں میں خوراک کی قلت کا خدشہ ظاہر کیا جا رہا ہے۔
محکمہ موسمیات کے مطابق آئندہ چند روز تک سردی اور برفباری کا سلسلہ برقرار رہنے کا امکان ہے۔ انتظامیہ نے شہریوں اور سیاحوں کو غیر ضروری سفر سے گریز، موسم کی صورتحال پر نظر رکھنے اور سرکاری ہدایات پر عمل کرنے کی تلقین کی ہے۔
بالائی علاقوں میں شدید برفباری، سڑکیں بند، پاک فوج کی امدادی کارروائیاں جاری
