اوٹاوہ ( پاک ترک نیوز) : کینیڈین فوڈ انسپیکشن ایجنسی نے ملک بھر میں فروخت ہونے والی کیڈبری ڈیری ملک اوریو چاکلیٹ بار کو فوری طور پر واپس منگوانے کا اعلان کر دیا ۔
ادارے کے مطابق یہ ری کال اس لیے جاری کی گئی کیونکہ چاکلیٹ میں پستہ موجود ہونے کے باوجود اس کا لیبل پر ذکر نہیں کیا گیا تھا۔
حکام کا کہنا ہے کہ اس پروڈکٹ کے استعمال کے بعد بعض افراد میں الرجی کی شکایات بھی رپورٹ ہوئی ہیں۔
کینیڈین فوڈ انسپیکشن ایجنسی نے اس ری کال کو کلاس ون قرار دیا ہے، جس کا مطلب ہے کہ اس پروڈکٹ کا استعمال سنگین طبی پیچیدگیوں یا بعض صورتوں میں جان لیوا ردعمل کا سبب بن سکتا ہے، خصوصاً ان افراد کے لیے جنہیں پستے سے الرجی یا حساسیت ہو۔
یہ بھی پڑھیں: قطر ایئرویز کے طیارے کا رابطہ منقطع، رائل ایئر فورس کے لڑاکا طیاروں نے گھیر ے میں لے کر مانچسٹر پہنچایا
ایجنسی نے عوام کو ہدایت کی ہے کہ اگر ان کے پاس یہ چاکلیٹ موجود ہے اور انہیں پستے سے الرجی ہے تو اسے ہرگز استعمال نہ کریں۔ متاثرہ مصنوعات کو نہ فروخت کیا جائے، نہ تقسیم کیا جائے اور نہ ہی کسی کو پیش کیا جائے۔
حکام نے صارفین کو مشورہ دیا ہے کہ وہ متعلقہ چاکلیٹ بار کو یا تو تلف کر دیں یا اسے اسی دکان پر واپس کر دیں جہاں سے خریدا گیا تھا۔
