واشنگٹن : (پاک ترک نیوز)رائٹرز کی ایک خصوصی رپورٹ کے مطابق وائٹ ہاؤس کے سچویشن روم میں ایک اہم اجلاس منعقد ہوا۔ یہ وہ خفیہ کمرہ ہے جہاں انتہائی حساس فیصلے کیے جاتے ہیں۔
اندر جانے سے قبل موبائل فون، گھڑی حتیٰ کہ عینک تک باہر رکھوانی پڑتی ہے۔ اسی کمرے میں مشیر ایران یا کسی اور ملک پر ممکنہ کارروائی سے متعلق آخری سفارشات مرتب کرتے ہیں۔
رپورٹ میں کہا گیا ہے کہ ایران کے خلاف طویل جنگ کی تیاری جاری ہے۔ افواج کی تعیناتی اور منصوبہ بندی کا عمل تیز کر دیا گیا ہے۔ سچویشن روم میں مشیروں نے ہدایت دی کہ تمام امریکی فوجی اڈوں پر مارچ تک مکمل تیاری یقینی بنائی جائے۔
دوسری جانب امریکی وزیر خارجہ مارکو روبیو کا بھی کہنا ہے کہ ایران کے ساتھ مذاکرات کامیاب ہوتے دکھائی نہیں دے رہے۔عمان اس معاملے میں ثالث کا کردار ادا کر رہا ہے۔
اطلاعات کے مطابق ایرانی تیل کی فروخت سے حاصل ہونے والی رقم کے انتظام میں بھی عمان کردار ادا کرے گا، جیسے اس وقتقطر وینزویلا کے تیل کی آمدنی کے معاملے میں شامل ہے۔
عمان کے سفیر نے امریکی حکام سے ملاقات کے بعد ایرانی وزیر خارجہعباس عراقچی سے بھی ملاقات کی اور انہیں مسودہ تیار کرنے کا کہا۔
کہا جارہا ہے کہ امریکی قیادت، بشمول ڈونلڈ ٹرمپ، کے بیانات سے ظاہر ہوتا ہے کہ امریکہ ایران کے ساتھ مفاہمت کے بجائے دباؤ کی حکمت عملی اختیار کیے ہوئے ہے۔
رپورٹس کے مطابق امریکہ وقت حاصل کر رہا ہے تاکہ مناسب وقت اور مقام کا تعین کر کے ایران کے خلاف کارروائی کی جا سکے۔ اس مقصد کے لیے طیارہ بردار بحری جہازوں کی نقل و حرکت بھی جاری ہے۔
