ٹی ٹوئنٹی ورلڈ کپ میں گرین شرٹس کا بھرپور وار، امریکا 32 رنز سے مات کھا گیا

کولمبو : (پاک ترک نیوز)ٹی ٹوئنٹی ورلڈ کپ کے گروپ اے کے اہم مقابلے میں پاکستان نے عمدہ آل راؤنڈ کارکردگی کا مظاہرہ کرتے ہوئے امریکا کو 32 رنز سے شکست دے دی۔
کولمبو میں کھیلے گئے میچ میں قومی ٹیم نے پہلے بیٹنگ کرتے ہوئے مقررہ 20 اوورز میں 9 وکٹوں کے نقصان پر 190 رنز اسکور کیے، جس کے جواب میں امریکی ٹیم 8 وکٹوں پر 158 رنز تک محدود رہی۔
ہدف کے تعاقب میں امریکا کی جانب سے شبھم رنجانے ذمہ دارانہ بیٹنگ کرتے ہوئے 51 رنز بنائے جبکہ شایان جہانگیر نے 49 رنز کی اننگز کھیلی۔ مِلند کمار 29 رنز کے ساتھ نمایاں رہے، تاہم دیگر بیٹرز بڑی شراکت قائم کرنے میں ناکام رہے۔ کپتان مونانک پٹیل صرف 3 رنز بنا سکے جبکہ محمد محسن اور سنجے کرشنامورتی کھاتہ کھولے بغیر پویلین لوٹ گئے۔
پاکستان کی جانب سے باؤلرز نے نپی تلی لائن اور لینتھ کے ساتھ حریف بیٹنگ لائن کو دباؤ میں رکھا۔ عثمان طارق نے تین اہم وکٹیں حاصل کیں، شاداب خان نے دو کھلاڑیوں کو آؤٹ کیا جبکہ محمد نواز، ابرار احمد اور شاہین شاہ آفریدی نے ایک، ایک وکٹ اپنے نام کی۔
اس سے قبل امریکا نے ٹاس جیت کر پاکستان کو بیٹنگ کی دعوت دی۔ قومی ٹیم کو ابتدائی جھٹکوں کے باوجود صاحبزادہ فرحان اور بابر اعظم کی شاندار بیٹنگ نے مضبوط پوزیشن میں پہنچایا۔
صاحبزادہ فرحان نے 73 رنز کی عمدہ اننگز کھیلتے ہوئے اپنے ٹی ٹوئنٹی انٹرنیشنل کیریئر کے ایک ہزار رنز بھی مکمل کیے۔ بابر اعظم نے 76 رنز کی ذمہ دارانہ اننگز کھیلی جبکہ شاداب خان نے 30 اور صائم ایوب نے 19 رنز کا اضافہ کیا۔
امریکی باؤلر شیڈلے وین اسکالکوک نے چار وکٹیں حاصل کر کے نمایاں کارکردگی دکھائی، جبکہ محمد محسن، سوربھ نیٹراولاکر اور ہرمیت سنگھ نے ایک، ایک کھلاڑی کو آؤٹ کیا۔میچ میں پاکستان کی متوازن بیٹنگ اور مؤثر باؤلنگ نے فیصلہ کن کردار ادا کیا، جس کے نتیجے میں ٹیم نے ٹورنامنٹ میں اہم کامیابی سمیٹ لی۔