لاہور(پاک ترک نیو ز)ایشین گیمز 2026 کے مردوں کے کرکٹ مقابلے کا فائنل پاکستان اور بھارت کے درمیان کھیلا جائے گا، تاہم میچ کے دوران بارش کے امکانات کے باعث مقابلے کے نتیجے پر سوالیہ نشان پیدا ہوگیا ہے۔
بارش کے خدشے کے پیش نظر ٹورنامنٹ انتظامیہ نے فائنل کے لیے قواعد و ضوابط واضح کردیئے ہیں۔ نئے قواعد کے مطابق اگر فائنل بارش کے باعث مکمل نہ ہوسکا تو کسی ایک ٹیم کو فاتح قرار نہیں دیا جائے گا بلکہ پاکستان اور بھارت دونوں مشترکہ طور پر طلائی تمغے کے حقدار ہوں گے۔
ایشین گیمز 2023 کے قوانین میں ایسی صورت حال میں زیادہ درجہ بندی رکھنے والی ٹیم کو فاتح قرار دینے کی گنجائش تھی، تاہم 2026 کے مقابلوں میں یہ اصول تبدیل کردیا گیا ہے۔
قواعد کے مطابق اگر میچ شروع ہونے کے بعد بارش مداخلت کرتی ہے تو نتیجہ اخذ کرنے کے لیے دوسری اننگز میں کم از کم پانچ اوورز کا کھیل ہونا ضروری ہوگا، جس کے بعد ڈک ورتھ لوئس طریقہ کار کے تحت فاتح کا فیصلہ کیا جائے گا۔
ٹورنامنٹ کے شیڈول کے مطابق فائنل کے لیے کوئی متبادل دن بھی مقرر نہیں کیا گیا، اس لیے مقررہ روز میچ مکمل نہ ہونے کی صورت میں دونوں ٹیموں کو مشترکہ طور پر طلائی تمغہ دیا جائے گا۔
