محمود خان اچکزئی قومی اسمبلی میں اپوزیشن لیڈر مقرر

اسلام آباد: (پاک ترک نیوز)قومی اسمبلی کے اجلاس میں اسپیکر سردار ایاز صادق نے محمود خان اچکزئی کو اپوزیشن لیڈر مقرر کرنے کا اعلان کر دیا ہے۔
اجلاس کے آغاز میں اسپیکر قومی اسمبلی سردار ایاز صادق نے کہا کہ آج وقفہ سوالات نہیں ہوگا اور اس کے بعدچیف وہپ کو اپوزیشن لیڈر کے نوٹیفکیشن کے لیے اسپیکر کے چیمبر میں بلا لیا گیا۔
بعد ازاں اسپیکر نے باضابطہ طور پر محمود خان اچکزئی کو اپوزیشن لیڈر بنانے کا اعلان کیا۔
قومی اسمبلی کے اجلاس میں وزیر قانون اعظم نذیر تارڑ نے پاکستان نرسنگ کونسل آرڈیننس کے علاوہ متعدد اہم بلز پیش کیے، جن میں ایکسپورٹ ڈویلپمنٹ فنڈ ترمیمی بل، درآمدات و برآمدات ایکٹ ترمیمی بل، پاکستان ٹیلی کمیونیکیشن تنظیم نو ترمیمی بل اور لائف انشورنس نیشنل لائیزیشن ترمیمی بل شامل ہیں۔
اس موقع پر چیئرمین پی ٹی آئی بیرسٹر گوہر کی قیادت میں پارٹی کا وفد اسپیکر آفس پہنچا اور نوٹیفکیشن حاصل کیا۔ گوہر نے کہا کہ اپوزیشن لیڈر کی نشست 7 اگست سے خالی تھی اور یہ ان کا قانونی حق تھا۔