امریکا نے ہائپرسونک ٹیکنالوجی کی آزمائش کے لیے سرد جنگ کے دور کے سپر سونک لڑاکا طیاروں کو دوبارہ میدان میں اتارنے کا منصوبہ بنا لیا۔ ایف 104 اسٹار فائٹر طیارے اپنے پروں کے نیچے جدید ہائپرسونک انٹرسیپٹر ’’ریور‘‘ لے کر پرواز کریں گے۔
امریکی کمپنی اسٹار فائٹرز اسپیس اور ہورائزن اپوجی نے 2027 میں اس ٹیکنالوجی کے تجربات کے لیے مشترکہ منصوبہ تیار کیا ہے، جس کے تحت پہلے طیارے کے ساتھ میزائل کی فضائی مطابقت اور کارکردگی کا جائزہ لیا جائے گا، بعد ازاں اسے فضا سے گرا کر تجربات کیے جائیں گے۔
ایف 104 اسٹار فائٹر طیارہ پہلی مرتبہ 1954 میں پرواز کر چکا ہے اور سرد جنگ کے زمانے میں سپر سونک انٹرسیپٹر کے طور پر استعمال ہوتا رہا۔ یہ طیارہ اپنی لمبی اور پتلی ساخت جبکہ چھوٹے پروں کے باعث راکٹ جیسی شکل رکھتا ہے۔ اس کی رفتار 1300 میل فی گھنٹہ سے زیادہ بتائی جاتی ہے۔
منصوبے کے مطابق 2027 کی دوسری سہ ماہی میں ریور انٹرسیپٹر کو طیارے کے ساتھ منسلک کرکے پروازیں کی جائیں گی، جبکہ تیسری سہ ماہی میں اسے فضا سے گرا کر آزمائش کا امکان ہے۔
ریور انٹرسیپٹر میں آرتھرس نامی جدید پروپلشن سسٹم استعمال کیا جائے گا، جو رفتار بڑھنے کے ساتھ ریم جیٹ سے اسکرام جیٹ نظام میں منتقل ہونے کی صلاحیت رکھتا ہے۔ یہ ٹیکنالوجی ہائپرسونک رفتار پر پرواز کرنے والے نظام کی تیاری میں اہم کردار ادا کر سکتی ہے۔
اس سے قبل 2027 کے آغاز میں ریور کے پروٹوٹائپ کا نیو میکسیکو کے وائٹ سینڈز میزائل رینج میں عمودی لانچ ٹیسٹ بھی کرنے کا منصوبہ ہے۔
ماہرین کے مطابق ان تجربات سے ہائپرسونک ٹیکنالوجی کی کارکردگی، فضائی ساخت اور انجن کے درمیان مطابقت سے متعلق اہم معلومات حاصل ہوں گی، جو مستقبل میں جدید دفاعی نظاموں کی تیاری میں مددگار ثابت ہو سکتی ہیں۔












