کراچی( پاک ترک نیوز ) چیئرمین پیپلز پارٹی بلاول بھٹو زرداری نے کہا ہے کہ ملک کا نظام تباہ ہوچکا ہے، لیکن وہ اس بحث میں نہیں جانا چاہتے کہ یہ کیوں اور کیسے تباہ ہوا۔ نظام کو دوبارہ درست کرنے کے لیے سیاسی ری سیٹ کی ضرورت ہے، تاہم یہ عمل غیر سیاسی نہیں ہونا چاہیے۔ سسٹم کی تباہی کے ذمہ دار ہم سب ہیں اور تمام اداروں کو عوام میں اپنا کھویا ہوا اعتماد بحال کرنا ہوگا۔
کراچی پریس کلب میں خطاب کرتے ہوئے بلاول بھٹو زرداری نے کہا کہ نظام کی تبدیلی کے لیے جو حل بتایا جا رہا ہے وہ درست نہیں، بہتری کے لیے سب کو مل کر کام کرنا ہوگا۔ ہر ادارے کو مضبوط اور بحال کیے بغیر عوام کے بنیادی مسائل حل نہیں ہوسکتے۔ پارلیمان، الیکشن کمیشن، عدلیہ اور میڈیا سمیت تمام اداروں کی ساکھ متاثر ہوئی ہے، انہیں ایک ایک کرکے بہتر بنانے کے لیے سنجیدہ بحث ضروری ہے۔
بلاول بھٹو نے ملک کی معاشی صورتحال پر تشویش کا اظہار کرتے ہوئے کہا کہ پاکستان کے عوام اس وقت انتہائی مشکل معاشی حالات سے گزر رہے ہیں۔ انہوں نے کہا کہ انہوں نے اپنی زندگی میں پاکستان کے اتنے خراب معاشی حالات نہیں دیکھے۔ غربت، بے روزگاری اور مہنگائی تیزی سے بڑھ رہی ہے اور خدشہ ہے کہ حالات مزید خراب ہوں گے۔ان کا کہنا تھا کہ عالمی حالات اور خطے میں جیو پولیٹیکل تبدیلیوں کے باعث پاکستان بھی مشکلات کا شکار ہے۔ معاشی بحران اور موجودہ صورتحال پر وہ ذاتی طور پر خوفزدہ ہیں۔ سوال یہ ہے کہ اس بحران میں غریب عوام، پسماندہ طبقات، مزدوروں، محنت کشوں اور سفید پوش طبقے کا کیا بنے گا؟پیپلز پارٹی چیئرمین نے کہا کہ پاکستان میں معاشی مشکلات میں مسلسل اضافہ ہورہا ہے، لیکن قیادت عوام اور ان کے اصل مسائل کو بھول چکی ہے۔ ہر موضوع پر بات ہوتی ہے، مگر عوامی مسائل کے حل پر گفتگو نہیں کی جاتی۔ سیاست دان نفرت اور تقسیم کی سیاست کررہے ہیں، جبکہ عوام اپنے مسائل کے حل کے لیے حکمرانوں سے اقدامات کی توقع رکھتے ہیں۔انہوں نے صحافیوں کے معاشی مسائل اور روزگار کے تحفظ پر بھی بات کی۔ بلاول بھٹو زرداری کا کہنا تھا کہ کراچی کے ایک نجی ٹی وی چینل نے ایک ماہ قبل 25 صحافیوں کو ملازمت سے فارغ کیا، جس سے تقریباً 50 خاندان متاثر ہوئے۔ صحافیوں کی بے روزگاری سے درجنوں خاندانوں کا معاشی مستقبل متاثر ہوتا ہے۔ حکمرانوں کو یاد دلانا صحافیوں اور سیاست دانوں کی ذمہ داری ہے کہ وہ اقتدار میں عوام کی خدمت کے لیے بیٹھے ہیں۔
یہ بھی پڑھیں: جرمنی کی جدید ترین جنگی طیارے کے منصوبے میں شمولیت کی راہ ہموار
آزادی صحافت کے حوالے سے بلاول بھٹو نے کہا کہ میڈیا معاشرے میں چیک اینڈ بیلنس کا اہم ادارہ ہے، لیکن پاکستان کی تاریخ میں آج میڈیا اور صحافی اتنے کمزور کبھی نہیں رہے۔ آزادی صحافت کے بغیر کوئی معاشرہ ترقی نہیں کرسکتا اور نہ ہی حقیقی بحث ممکن ہے۔ان کا کہنا تھا کہ صحافیوں کو مکمل سچ بولنے اور عوامی مسائل اجاگر کرنے کی آزادی ہونی چاہیے۔ سچ بولنے پر قانونی کارروائی کے خوف سے آزاد صحافت کا ماحول قائم نہیں ہوسکتا۔ میڈیا کی آزادی کے بغیر ملک کا نظام بھی درست طور پر نہیں چل سکتا۔بلاول بھٹو زرداری نے کراچی پریس کلب کو تاریخی ادارہ قرار دیتے ہوئے کہا کہ صحافیوں کا قلم اور آواز کسی بھی بندوق، گولی اور ہتھیار سے زیادہ طاقتور ہیں۔ صحافی عوام کے مسائل اجاگر کرکے حکومتوں کی توجہ دلاتے ہیں، جبکہ ان کا قلم اور آواز حکومتیں گرانے اور بنانے کی طاقت رکھتے ہیں۔ انہوں نے کراچی پریس کلب کی دعوت پر اظہار تشکر بھی کیا۔












