لاہور( پاک ترک نیوز ) امیر جماعت اسلامی حافظ نعیم الرحمان نے کہا ہے کہ ملک میں مہنگائی کے باعث عوام کی مشکلات بڑھ گئی ہیں، آٹا انتہائی مہنگے داموں فروخت ہو رہا ہے جبکہ گندم کی قیمت 5800 روپے فی من تک پہنچ چکی ہے۔لاہور میں پریس کانفرنس کرتے ہوئے حافظ نعیم الرحمان کا کہنا تھا کہ کسانوں سے گندم زیادہ سے زیادہ 3500 روپے فی من خریدی گئی، لیکن یہی گندم مارکیٹ میں 5800 روپے تک فروخت ہو رہی ہے۔ سوال یہ ہے کہ درمیان میں کون لوگ فائدہ اٹھا رہے ہیں؟ فلور ملز ایسوسی ایشن بھی متعدد مرتبہ شکایت کر چکی ہے کہ اسے انتہائی خراب معیار کی گندم فراہم کی جا رہی ہے۔
انہوں نے کہا کہ فروری میں جنگ شروع ہونے کے بعد عالمی منڈی میں تیل کی قیمتوں میں اضافہ ہوا تو حکومت نے پاکستان میں بھی پیٹرولیم مصنوعات مہنگی کرنے کے ساتھ لیوی میں اضافہ کردیا۔ ان کے بقول پیٹرول 458 روپے اور ڈیزل 500 روپے فی لیٹر تک پہنچا دیا گیا، تاہم جماعت اسلامی کے احتجاج کے بعد پیٹرول 80 روپے اور ڈیزل 32 روپے سستا ہوا۔حافظ نعیم الرحمان نے دعویٰ کیا کہ وزرا خود پیٹرول کی قیمت ایک ہزار روپے فی لیٹر تک پہنچنے کا خدشہ ظاہر کر رہے تھے، جبکہ اس صورتحال سے حکومت اور ریفائنریز کی آمدن میں اضافہ ہو رہا تھا۔امیر جماعت اسلامی نے شوگر ملز کے حوالے سے الزام عائد کیا کہ زرداری، شریف اور ترین خاندانوں کی شوگر ملز ہیں اور حکومتیں کسی کی بھی ہوں، بااثر کاروباری گروہ اپنا اثر و رسوخ برقرار رکھتے ہیں۔ ان کا کہنا تھا کہ چینی کی درآمد اور برآمد کا مطالبہ بھی یہی گروہ کرتے ہیں اور منظوری بھی انہی کے مطالبے پر دی جاتی ہے۔انہوں نے کہا کہ حکومتی پالیسیوں کے باعث ملک میں آٹا درآمد کرنا پڑ رہا ہے، جبکہ 15 نومبر کی ڈیڈ لائن گزرنے کے باوجود گنے کی کرشنگ شروع نہیں ہوسکی۔ ان کے مطابق کسانوں کو باردانہ نہیں ملتا، پیداواری اخراجات پورے نہیں ہوتے اور عوام کو آٹا اور روٹی مہنگے داموں خریدنا پڑ رہی ہے۔
یہ بھی پڑھیں: وزیراعلیٰ پنجاب مریم نواز کا ’’اپنا گاؤں پروگرام‘‘ شروع کرنے کا فیصلہ
حافظ نعیم الرحمان کا کہنا تھا کہ ملک کی مجموعی زراعت کی ترقی کی شرح پہلے 6.54 فیصد تھی، جو حکومت کی اپنی رپورٹ کے مطابق کم ہو کر 0.4 فیصد رہ گئی ہے۔ کھاد بھی مہنگے داموں مل رہی ہے اور حکومتی پالیسیوں کے باعث زرعی شعبہ مشکلات کا شکار ہے۔انہوں نے مزید کہا کہ گزشتہ دس برس کے دوران کپاس کی فصل میں 60 فیصد تک کمی آچکی ہے۔ اسپیکر پنجاب اسمبلی بھی کہہ چکے ہیں کہ کپاس کے کھیتوں کی جگہ ہاؤسنگ سوسائٹیاں بن رہی ہیں۔ ان کا کہنا تھا کہ حکومت عملی اقدامات کے بجائے تقریبات اور تصویری سرگرمیوں تک محدود ہے، جبکہ کسان اور عام شہری مہنگائی کا بوجھ برداشت کر رہے ہیں۔












