لندن ( پاک ترک نیوز) برطانیہ میں امریکی فضائیہ کے اہم اڈے آر اے ایف لیکن ہیتھ کے اوپر مشتبہ ڈرونز کی سرگرمی، امریکی سیکیورٹی اہلکاروں نے فوری کارروائی کرتے ہوئے صورتحال پر قابو پا لیا۔امریکی فضائیہ کے ترجمان کے مطابق سفوک میں واقع آر اے ایف لیکن ہیتھ کے اوپر غیر مجاز ڈرون سرگرمی کی اطلاعات موصول ہوئیں، جس پر سیکیورٹی اہلکاروں نے فوری ردعمل دیا۔ واقعے میں کوئی اہلکار، طیارہ یا تنصیبات متاثر نہیں ہوئیں۔برطانوی وزارت دفاع کے ترجمان کا کہنا ہے کہ متعلقہ اداروں کے ساتھ رابطہ اور حقائق جاننے کا عمل جاری ہے، تاہم واقعہ حل کر لیا گیا ہے۔
مقامی رکن پارلیمنٹ نک ٹموتھی کے مطابق اڈے کے حکام نے انہیں بتایا ہے کہ عوام کو کوئی خطرہ نہیں اور صورتحال معمول پر آ چکی ہے۔ انہوں نے شہریوں کو مشکوک سرگرمیوں کی اطلاع حکام کو دینے کی ہدایت بھی کی۔یہ واقعہ ایسے وقت میں پیش آیا ہے جب برطانیہ میں امریکی فوجی اڈوں کی سیکیورٹی مزید سخت کر دی گئی ہے۔ رواں ہفتے آر اے ایف ملڈن ہال سے امریکی فضائیہ کے کم از کم 12 طیاروں کی روانگی بھی سامنے آئی، جن میں دو KC-135 اسٹریٹو ٹینکر فضائی ری فیولنگ طیارے شامل تھے۔وال اسٹریٹ جرنل نے دعویٰ کیا کہ امریکی طیاروں کی روانگی ایران کی جانب سے ایک نئے خطرے کے ردعمل میں ہوئی، تاہم بی بی سی نے اس دعوے کی آزادانہ تصدیق نہیں کی۔
یہ بھی پڑھیں: تربیلا ڈیم کے پانچویں توسیعی منصوبے میں بڑا شگاف بند کرنے کا کام تیز
اس سے قبل ستمبر میں آر اے ایف فیئر فورڈ کے قریب ایک مشتبہ واقعہ پیش آیا تھا، جس کے بعد امریکی اڈوں پر سیکیورٹی سرگرمیاں بڑھا دی گئی تھیں۔ ایران نے اس واقعے میں ملوث ہونے کی تردید کی تھی۔آر اے ایف لیکن ہیتھ میں امریکی فضائیہ کا 48 واں فائٹر ونگ تعینات ہے، جہاں تقریباً 7 ہزار امریکی فوجی اہلکار خدمات انجام دیتے ہیں۔ اسے یورپ میں امریکی فضائیہ کا سب سے بڑا لڑاکا طیاروں کا آپریشن قرار دیا جاتا ہے۔
