کراچی (پاک ترک نیوز)سندھ میں موسمیاتی تبدیلی کے بڑھتے خطرات سے نمٹنے کے لیے حکومت نے اقدامات تیز کرنے کا فیصلہ کرلیا، وزیراعلیٰ سندھ سید مراد علی شاہ نے سیلاب، خشک سالی، پانی کی قلت اور ساحلی کٹاؤ سے بچاؤ کے لیے مربوط حکمت عملی تیار کرنے کی ہدایت کردی۔
کراچی میں وزیراعلیٰ مراد علی شاہ کی زیر صدارت موسمیاتی تبدیلی سے متعلق اجلاس ہوا، جس میں جاری منصوبوں، مستقبل کی ترجیحات اور موسمیاتی خطرات سے نمٹنے کے لیے بنیادی ڈھانچے کا جائزہ لیا گیا۔
وزیراعلیٰ سندھ کا کہنا تھا کہ موسمیاتی تبدیلی صوبے کے لیے محض ماحولیاتی مسئلہ نہیں بلکہ ترقی کا بنیادی چیلنج ہے، ہمیں سیلاب، خشک سالی، پانی کی قلت اور ساحلی کٹاؤ جیسے خطرات کا سامنا رہتا ہے۔
انہوں نے کہا کہ عوام کی جان و مال، ذرائع معاش اور آبی وسائل کا تحفظ حکومت کی اولین ترجیح ہے۔
اجلاس میں مینگرووز کے جنگلات کی بحالی، ساحلی علاقوں کے قدرتی تحفظ کو وسعت دینے، بارش کے پانی کو ذخیرہ کرنے اور آبپاشی کے نظام کو بہتر بنانے پر زور دیا گیا۔
یہ بھی پڑھیں: افغانستان سے منشیات اسمگلنگ کا عالمی نیٹ ورک بے نقاب، تاجکستان میں 9 ملزمان گرفتار
وزیراعلیٰ نے سیلاب سے بچاؤ، متاثرہ مکانات کی تعمیر نو، پانی کے تحفظ اور ماحول دوست ترقیاتی منصوبوں پر عمل درآمد تیز کرنے کی ہدایت بھی کی۔
مراد علی شاہ نے متعلقہ محکموں کو بین الاقوامی ترقیاتی اداروں اور نجی سرمایہ کاروں کے ساتھ اشتراک بڑھانے کا حکم دیتے ہوئے کہا کہ تمام منصوبوں کا مقصد عوام کی زندگیوں میں دیرپا اور مثبت بہتری لانا ہے۔
وزیراعلیٰ سندھ نے واضح کیا کہ موسمیاتی تبدیلی سے محفوظ اور پائیدار ترقی صوبائی حکومت کے ترقیاتی ایجنڈے کی اہم ترجیح رہے گی۔
