راولپنڈی (پاک ترک نیوز)راولپنڈی ٹیسٹ کے تیسرے دن کا کھیل ختم ہو گیا، سری لنکا نے پہلی اننگز میں چار وکٹوں کے نقصان پر 404 رنز بنا لیے ہیں۔ مہمان ٹیم کو پاکستان کی پہلی اننگز کی برتری ختم کرنے کے لیے مزید 30 رنز درکار ہیں جبکہ اس کی چھ وکٹیں ابھی باقی ہیں۔
سری لنکا نے تیسرے دن کے کھیل کا آغاز ایک سو چودہ رنز تین کھلاڑی آؤٹ سے کیا۔ کمنڈو مینڈس 58 رنز بنا کر آؤٹ ہوئے، جس کے بعد دھننجایا ڈی سلوا اور کپتان کوشل مینڈس نے پاکستانی بولرز کے خلاف بھرپور مزاحمت کی۔
دھننجایا ڈی سلوا 167 رنز جبکہ کوشل مینڈس 117 رنز بنا کر ناٹ آؤٹ ہیں۔ دونوں بلے بازوں نے شاندار سنچریاں مکمل کرتے ہوئے سری لنکا کی پوزیشن مستحکم کر دی۔
پاکستان کی جانب سے تجربہ کار محمد عباس اور نوجوان بولر ثاقب خان نے دو، دو وکٹیں حاصل کیں۔
یاد رہے کہ پاکستان نے پہلی اننگز میں نو وکٹوں کے نقصان پر 434 رنز بنا کر اننگز ڈیکلیئر کر دی تھی۔ چوتھے روز کھیل کا آغاز سری لنکا کی اننگز سے ہوگا، جہاں مہمان ٹیم پاکستان کی برتری ختم کرنے اور سبقت حاصل کرنے کی کوشش کرے گی۔
