نیو یارک ( پاک ترک نیوز) امریکی خلائی ادارے ناسا نے چاند پر مستقل انسانی اڈہ قائم کرنے کے منصوبے میں طلبہ کی صلاحیتوں سے فائدہ اٹھانے کے لیے 10 لاکھ ڈالر کے انعامات پر مشتمل مقابلے کا اعلان کردیا۔
ناسا کے سربراہ جیرڈ آئزک مین نے کہا ہے کہ امریکا بھر کے ہائی اسکول اور اعلیٰ تعلیمی اداروں کے طلبہ کو چاند پر انسانی رہائش کے مسائل حل کرنے کے لیے اپنی تجاویز پیش کرنے کی دعوت دی گئی ہے۔مقابلے میں طلبہ کی ٹیمیں چھ شعبوں میں اپنے منصوبے پیش کرسکیں گی، جن میں بجلی کی فراہمی، رہائشی ڈھانچے، مواصلاتی نظام، نقل و حرکت، زندگی برقرار رکھنے کے نظام اور خلا بازوں کی حفاظت شامل ہیں۔
ناسا کے مطابق چاند پر طویل رات کے دوران بجلی کی فراہمی، سخت موسمی اور ماحولیاتی حالات سے خلا بازوں کا تحفظ اور انسانوں و سامان کی نقل و حمل بڑے چیلنجز ہیں۔مقابلے کے مختلف مراحل میں طلبہ پہلے اپنے ابتدائی منصوبے جمع کرائیں گے، بعد ازاں منتخب ٹیمیں اپنی تجاویز کو مزید بہتر بنائیں گی، جبکہ فائنلسٹ ٹیموں کو ناسا کے اعلیٰ حکام کے سامنے اپنے منصوبے پیش کرنے کا موقع ملے گا۔جیرڈ آئزک مین کا کہنا ہے کہ انعامی رقم کے علاوہ طلبہ کے لیے اصل موقع یہ ہے کہ وہ ایسے مسائل کے حل پر کام کرسکیں جن پر ناسا عملی طور پر کام کر رہا ہے۔
یہ بھی پڑھیں: پاکستان اور سعودی عرب کا تجارت و سرمایہ کاری بڑھانے کے لیے مشترکہ فنڈ قائم
مقابلے کے لیے رجسٹریشن کی آخری تاریخ 25 جنوری 2027 مقرر کی گئی ہے۔
