امریکی محکمہ دفاع نے شام میں ترکیہ مخالف دہشتگرد تنظیموں کے لئے 130ملین ڈالر مختص کر دئیے

واشنگٹن (پاک ترک نیوز)
پینٹاگون نے آئندہ سال 2026 کےدوران داعش کی سرکوبی کے لئے قائم کئے گئے کاؤنٹر آئی ایس آئی ایس ٹرین اینڈ ایکوئپ فنڈ (سی ٹی ای ایف)کے تحت شام میں سیرین ڈیموکریٹک فورسز (ایس ڈی ایف) نامی گروپ کے لیے 130 ملین ڈالر مختص کیے ہیں ۔ حالانکہ اس گروپ کی سرپرستی دہشت گرد تنظیم پی کے کے کی شامی شاخ وائی پی جی کررہی ہے۔
امریکی محکمہ دفاع کی2026 کے بجٹ دستاویز کے مطابق اس فنڈ کا مقصد عراق اور لبنان میں "جانچ شدہ شراکت دار فورسز” کے ساتھ ساتھ جنوب مشرقی شام میں واقع امریکی حمایت یافتہ ایس ڈی ایف اور شامی فری آرمی کی تربیت، سازوسامان اور ماہانہ وظیفوں کی فراہمی یقینی بنانا ہے۔دستاویز کے مطابق مختص شدہ فنڈز میں ہلکے ہتھیاروں کے ساتھ طبی سامان اور سہولیات کی مرمت بھی شامل ہے۔اور اس کا مقصد داعش کو دوبارہ سراٹھانے سے روکنا ہے۔ کیونکہ داعش کا دوبارہ سر اٹھانا امریکی قومی مفادات، عراق، شام، لبنان اور عالمی برادری کے لیے خطرہ ہے۔
شام کے لیے مختص کیے گئے 130 ملین ڈالر میں سے 7.42 ملین ڈالر شام کی آزاد فوج کے لیے مختص کیے گئےہیں۔دستاویز میں یہ اشارہ کیا گیا ہے کہ اس گروپ سے بدیہ صحرائی علاقے میں داعش کے عناصر کے خلاف "اپنی رسائی کو بڑھانے” کی توقع ہے۔
یاد رہے کہ پینٹاگون کا شام میں داعش سے لڑنے کے بہانےپی کے کے اور وائی پی جی دہشت گرد گروپ سمیت دیگر گروپوں کے لیے مختص کردہ کل بجٹ 2025 میں 147.9 ملین ڈالر اور 2024 میں 156 ملین ڈالر تھا۔