لاہور(پاک ترک نیوز ) کوٹ لکھپت جیل میں قید پاکستان تحریک انصاف کے رہنما شاہ محمود قریشی کی طبیعت اچانک ناساز ہوگئی، وہ اپنی بیرک میں چہل قدمی کے دوران چکر آنے سے گر پڑے۔
شاہ محمود قریشی کے وکیل بیرسٹر تیمور ملک کے مطابق گرنے کے باعث ان کے جسم پر چوٹیں آئی ہیں، جبکہ گھٹنے اور بازو پر بھی زخم آئے ہیں۔
وکیل کا کہنا ہے کہ جیل حکام نے شاہ محمود قریشی کے خون کے نمونے حاصل کرکے شوکت خانم اسپتال بھجوا دیے ہیں۔
بیرسٹر تیمور ملک کے مطابق ڈاکٹر یاسمین راشد کے مشورے پر شاہ محمود قریشی کے سی ٹی اسکین اور مزید علاج معالجے کے لیے درخواست دائر کی جا رہی ہے۔
انہوں نے کہا کہ شاہ محمود قریشی کی طبی حالت کے پیش نظر ضروری طبی معائنے اور علاج کی سہولت فراہم کرنے کی استدعا کی جائے گی۔
