اسلام آباد(پاک ترک نیوز)نیشنل سائبر سکیورٹی ادارے نے تھرڈ پارٹی وینڈرز اور سپلائرز کے ذریعے سائبر حملوں کے خطرات سے متعلق ایڈوائزری جاری کردی، جس میں اداروں کو بیرونی سروس فراہم کرنے والوں کی رسائی محدود رکھنے اور ان کی سکیورٹی جانچ یقینی بنانے کی ہدایت کی گئی ہے۔
ایڈوائزری کے مطابق تھرڈ پارٹی سروسز اداروں کے سائبر سکیورٹی نظام میں کمزوری کا سبب بن سکتی ہیں، جبکہ کلاؤڈ سروسز اور بیرونی سافٹ ویئر کا استعمال بھی سائبر سکیورٹی کے لیے خطرات پیدا کرسکتا ہے۔
نیشنل سائبر سکیورٹی ادارے نے ہدایت کی ہے کہ وینڈرز کو غیر ضروری سسٹمز اور ڈیٹا تک رسائی دینے سے گریز کیا جائے۔ سائبر خطرات سے بچاؤ کے لیے سپلائرز کی سکیورٹی جانچ اور تھرڈ پارٹی ایپس سمیت سافٹ ویئر اپ ڈیٹس کی سکیورٹی یقینی بنانا ضروری قرار دیا گیا ہے۔
ایڈوائزری میں حساس معلومات کے تحفظ کے لیے بیرونی اداروں کے ساتھ ڈیٹا شیئرنگ میں احتیاط برتنے اور سروس فراہم کرنے والوں کی سرگرمیوں کی باقاعدہ نگرانی کرنے کی سفارش بھی کی گئی ہے۔
مزید کہا گیا ہے کہ سائبر حملوں سے نمٹنے کے لیے واقعات کی فوری رپورٹنگ اور مؤثر ردعمل کا نظام اپنایا جائے، جبکہ ادارے اپنی سائبر سکیورٹی مضبوط بنانے کے لیے محفوظ اور قابلِ اعتماد شراکت داروں کا انتخاب یقینی بنائیں۔
یہ بھی پڑھیں: تھرپارکر: ایمبولینس میں آکسیجن سلنڈر پھٹنے سے اموات کی تعداد 10 ہوگئی
ایڈوائزری کے مطابق تھرڈ پارٹی وینڈرز کی رسائی محدود رکھنا، ان کی سکیورٹی جانچ کرنا اور بیرونی سروسز کی مسلسل نگرانی کرنا حساس ڈیٹا اور اداروں کے ڈیجیٹل نظام کو محفوظ بنانے کے لیے اہم اقدامات ہیں۔
