ریاض(پاک ترک نیوز)سعودی عرب نے سنگاپور کی حکومت کے ساتھ خام تیل زیرِ زمین غاروں میں ذخیرہ کرنے کا معاہدہ کر لیا ہے۔ بلومبرگ کی رپورٹ کے مطابق سعودی خام تیل سنگاپور کے جنوبی علاقے جورونگ میں واقع زیرِ زمین ذخیرہ گاہوں میں رکھا جائے گا، جہاں تیل کی ترسیل آئندہ سال کی دوسری ششماہی میں شروع ہونے کا امکان ہے۔
جورونگ راک کیورنز نامی ان ذخیرہ گاہوں کی مجموعی گنجائش 14 لاکھ 70 ہزار مکعب میٹر ہے، جہاں خام تیل، کنڈینسیٹس اور دیگر مائعات ذخیرہ کیے جا سکتے ہیں۔ یہ گنجائش تقریباً 90 لاکھ بیرل کے برابر ہے۔
رپورٹ کے مطابق سعودی آرامکو بیرونِ ملک تیل ذخیرہ کرنے کی مزید گنجائش حاصل کرنے کے لیے بھی کوششیں کر رہی ہے۔ خلیج فارس میں جنگ اور بحیرۂ احمر تک پھیلتی کشیدگی کے باعث سعودی عرب کی تیل کی صنعت اور برآمدات متاثر ہوئی ہیں۔ یمن کے حوثی جنگجوؤں کی جانب سے سعودی تنصیبات اور بحری جہازوں کو نشانہ بنائے جانے کے بعد تیل کی ترسیل میں مشکلات بڑھ گئی ہیں۔
ان حالات میں سعودی عرب مشرق میں خلیج عمان کے قریب جہاز سے جہاز میں تیل منتقل کرنے کا طریقہ اختیار کر رہا ہے، جبکہ مغرب کی جانب تیل بردار جہاز نہرِ سویز کے راستے بھیجے جا رہے ہیں۔
سنگاپور کے وزیر توانائی تان سی لینگ کے مطابق یہ معاہدہ جنوب مشرقی ایشیا میں سعودی خام تیل کی سپلائی چین کو مزید مستحکم کرے گا اور رسد میں تعطل کی صورت میں سنگاپور کی توانائی ضروریات کے تحفظ میں بھی مدد دے گا۔
یہ بھی پڑھیں: لکی گروپ اور قطر انرجی کا پورٹ قاسم میں ایل این جی ٹرمینل منصوبے سے دستبرداری کا اعلان
سعودی وزیر توانائی شہزادہ عبدالعزیز بن سلمان نے کہا کہ اہم ایشیائی منڈیوں کے قریب تیل ذخیرہ کرنے سے سپلائی نیٹ ورک میں لچک بڑھے گی اور توانائی کی فراہمی کے تحفظ کو تقویت ملے گی۔ ان کے مطابق سعودی عرب اس تعاون کو مستقبل میں مزید وسعت دینے کے امکانات بھی دیکھ رہا ہے۔
