اسلام آباد(پاک ترک نیوز)وزیر خزانہ محمد اورنگزیب کہتے ہیں معاشی استحکام کے لیے مہنگائی پر قابو پانا ضروری ہے، پاکستان رواں سال عالمی سرمایہ منڈیوں سے قرض لینے میں جلد بازی نہیں کرے گا۔
وزیر خزانہ محمد اورنگزیب نے کہا ہے کہ حکومت کی قرض حکمت عملی کا بنیادی مقصد بیرونی قرضوں کی ادائیگی کا بوجھ کم کرنا ہے۔ پاکستان نے رواں سال پچھتر کروڑ ڈالر کے بانڈز نجی طور پر جاری کیے ہیں۔
انہوں نے کہا کہ قرضوں کے حصول کے لیے قرض کی ساکھ بہتر بنانے کے اقدامات کے ذریعے پاکستان نے چین کی پانڈا بانڈ منڈی تک کامیاب رسائی حاصل کی۔ چین کی بڑی بانڈ منڈی میں پاکستان کی رسائی ایک اہم پیش رفت ہے۔
وزیر خزانہ کے مطابق پاکستان رواں سال عالمی سرمایہ منڈیوں سے قرض لینے میں جلد بازی نہیں کرے گا بلکہ مالی ضروریات اور معاشی حالات کو مدنظر رکھتے ہوئے فیصلے کیے جائیں گے۔
یہ بھی پڑھیں: کرسٹوفر نولان کی فلم ’’دی اوڈیسی‘‘ نے کوریا میں تاریخ رقم کردی
محمد اورنگزیب نے کہا کہ حکومت پاکستان کے یورو بانڈز کو ڈیجیٹل ٹوکن کی شکل دینے کے امکان کا بھی جائزہ لے گی۔ ان اقدامات کا مقصد قرضوں کے انتظام کو بہتر بنانا، بیرونی ادائیگیوں کا دباؤ کم کرنا اور معاشی استحکام کو برقرار رکھنا ہے۔
