اسلام آباد ( پاک ترک نیوز) وزیراعظم شہباز شریف نے کہا ہے کہ پاکستان نے مشکل معاشی حالات پر قابو پالیا ہے، اب معیشت کی ترقی کی شرح بڑھا کر روزگار کے نئے مواقع پیدا کرنا ہوں گے۔ اصلاحات کے لیے وفاقی اور صوبائی حکومتوں کا ٹیم ورک مثالی ہے۔پاکستان اسٹاک ایکسچینج کی تقریب سے وڈیو لنک کے ذریعے خطاب کرتے ہوئے وزیراعظم نے کہا کہ آج ملک میں سرمایہ کاری اور معاشی سرگرمیوں کے لیے بہتر صورتحال نظر آ رہی ہے۔ پاکستان کو اپنے پاؤں پر کھڑا کرنے کے لیے حکومت اور متعلقہ اداروں کی کاوشیں قابل تحسین ہیں۔
شہباز شریف نے کہا کہ خطے کے دیگر ممالک کی اسٹاک مارکیٹوں کو سامنے رکھتے ہوئے پاکستان میں مزید اصلاحات اور تبدیلیاں لانے کی ضرورت ہے۔ پاکستان کو اس کا جائز مقام دلانے کے لیے ابھی بہت کام کرنا باقی ہے، ملک کی تمام صنعتوں کو فروغ دینا ہوگا۔وزیراعظم نے کہا کہ معاشی اصلاحات کے حوالے سے وفاقی اور صوبائی حکومتوں کا ٹیم ورک قابل تحسین ہے۔ حکومت اور متعلقہ اداروں کی مشترکہ کوششوں کے نتیجے میں ملک مشکل معاشی صورتحال سے باہر نکلا ہے۔شہباز شریف نے بتایا کہ امریکا اور برطانیہ کے حالیہ دوروں کے دوران عالمی بینکوں کے نمائندوں سے ملاقاتیں ہوئیں۔ عالمی مالیاتی اداروں کے حکام نے پاکستان کی معاشی صورتحال میں بہتری اور حکومتی اقدامات کو سراہا۔وزیراعظم نے کہا کہ پاکستان نے سنجیدگی کے ساتھ معاشی اصلاحات پر عمل درآمد کیا، جس کے نتیجے میں ملک میں معاشی سرگرمیوں کے لیے بہتر ماحول پیدا ہوا ہے۔
یہ بھی پڑھیں: لاہور زیادتی کیس: آذربائیجانی خاتون ڈیانا کے سابق شوہر پر سنگین الزامات
انہوں نے کہا کہ پاکستان کو معاشی استحکام سے آگے لے جا کر پائیدار ترقی کی طرف بڑھانا ہوگا۔ روزگار کے مواقع پیدا کرنے اور صنعتی سرگرمیوں میں اضافہ کرنے کے لیے مزید اقدامات ضروری ہیں۔وزیراعظم نے کہا کہ عالمی مالیاتی فنڈ کی سربراہ نے بھی پاکستان کی معاشی صورتحال میں ہونے والی بہتری کو سراہتے ہوئے اسے نئے پاکستان سے تعبیر کیا۔شہباز شریف نے کہا کہ پاکستان کی حالیہ معاشی کامیابیوں میں قومی اداروں کے درمیان تعاون بھی اہم ہے۔ انہوں نے فیلڈ مارشل عاصم منیر کی کاوشوں کا ذکر کرتے ہوئے کہا کہ ان کا ذکر کیے بغیر یہ کامیابیاں ادھوری ہیں۔
