مظفر آباد ( پاک ترک نیوز) وفاقی وزیر امیر مقام نے الزام عائد کیا ہے کہ خیبر پختونخوا کی پی ٹی آئی حکومت آئی جی اور چیف سیکریٹری کو اپنے ماتحت کرنے کی کوشش کر رہی ہے، آئین کے خلاف کوئی قانون سازی منظور نہیں ہونے دیں گے۔پشاور میں نیوز کانفرنس کرتے ہوئے امیر مقام نے کہا کہ پی ٹی آئی کا ایجنڈا صرف ایک قیدی کی رہائی ہے، صوبائی حکومت نے عوام کو کوئی ثمرات نہیں دیے۔
یہ بھی پڑھیں: میر رضا کیس: جوڈیشل کمیشن کی توسیع کی سمری وزیراعلیٰ سندھ نے منظور کرلی
انہوں نے کہا کہ ایک کٹھ پتلی وزیراعلیٰ عوام کے مینڈیٹ کی حفاظت نہیں کرسکتا، موجودہ وزیراعلیٰ کو حکومت چلانے کا کوئی تجربہ نہیں، وہ کونسلر تک نہیں رہے۔امیر مقام کا کہنا تھا کہ تبدیلی سرکار نے صرف وزرائے اعلیٰ تبدیل کیے، عوام کی قسمت نہیں بدلی۔وفاقی وزیر نے الزام عائد کیا کہ خیبر پختونخوا میں موجودہ حکومت لوٹ مار میں ملوث ہے اور عوام کے مینڈیٹ کا خیال نہیں رکھا جا رہا۔ صوبے کا ہر شعبہ تباہ ہوچکا ہے۔
انہوں نے کہا کہ خیبر پختونخوا کا سب سے بڑا مسئلہ امن و امان ہے۔ وزیراعلیٰ سہیل آفریدی کے طرزِ حکومت سے ایسا لگ رہا ہے جیسے صوبائی حکومت دہشت گردوں کے ساتھ مل گئی ہو۔امیر مقام نے کہا کہ صوبے میں امن و امان کی صورتحال بہتر بنانے اور عوام کے مسائل حل کرنے کے لیے مؤثر اقدامات کی ضرورت ہے۔
