ڈیرہ اسماعیل خان (پاک ترک نیوز )ڈیرہ اسماعیل خان کے علاقے درازندہ میں مبینہ خودکش دھماکے کے نتیجے میں 2 سالہ بچے اور 2 خواتین سمیت 12 افراد شہید ہوگئے۔
دھماکا ڈی آئی خان، کوئٹہ روڈ پر قائم انسداد اسمگلنگ امن میلہ پولیس چیک پوسٹ پر ہوا، جہاں بارود سے بھری گاڑی چیک پوسٹ سے ٹکرائی گئی۔
ذرائع کا کہنا ہے کہ دھماکے میں پولیس اور کسٹمز اہلکاروں سمیت شہری بھی نشانہ بنے، جبکہ 30 سے زائد افراد زخمی ہوئے۔
آر پی او کے مطابق جاں بحق افراد میں ایک کسٹمز اہلکار بھی شامل ہے، جبکہ دھماکے میں 35 افراد زخمی ہوئے ہیں۔
زخمیوں میں بعض کی حالت تشویشناک بتائی جارہی ہے، جس کے باعث شہدا کی تعداد میں اضافے کا خدشہ ظاہر کیا جارہا ہے۔
ذرائع کے مطابق انسداد اسمگلنگ چیک پوسٹ پر حملہ دہشت گردوں اور جرائم پیشہ عناصر کے گٹھ جوڑ کی نشاندہی کرتا ہے، جبکہ خوارج کی جانب سے ایک بار پھر سکیورٹی اہلکاروں اور شہریوں کو نشانہ بنایا گیا۔
