تہران(پاک ترک نیوز ) ایران نے امریکا کے ساتھ مذاکرات کی بحالی اور جنگ کے خاتمے کے لیے تین شرائط پیش کردی ہیں، جبکہ تہران کی جانب سے امریکی صدر ڈونلڈ ٹرمپ کے جواب کا انتظار کیا جا رہا ہے۔
ایرانی قومی سلامتی کونسل کے سیکریٹری محسن رضائی نے الجزیرہ سے گفتگو کرتے ہوئے بتایا کہ ایران نے قطری ثالث کے ذریعے امریکا کو اپنے مطالبات سے آگاہ کردیا ہے۔
محسن رضائی کے مطابق ایران کسی بھی معاہدے تک پہنچنے کے لیے تمام محاذوں پر جنگ کا خاتمہ، منجمد ایرانی اثاثوں کی بحالی اور امریکی بحری ناکہ بندی ختم کرنے کا مطالبہ کر رہا ہے۔
انہوں نے کہا کہ ایران قطری ثالث کے ساتھ مسلسل رابطے میں ہے اور ثالث نے تہران کے مطالبات واشنگٹن تک پہنچا دیے ہیں۔
ایرانی عہدیدار کے مطابق ایران اور امریکا کے درمیان کئی ماہ سے جاری جنگ کے دوران بالواسطہ سفارتی رابطوں کا سلسلہ جاری رہا، جبکہ اسلام آباد مفاہمتی یادداشت کے خاتمے کے بعد بھی یہ رابطے برقرار رہے۔
انہوں نے بتایا کہ پاکستان کی میزبانی میں جون میں ہونے والی بات چیت کے بعد مفاہمتی یادداشت پر دستخط کیے گئے تھے، جس کا مقصد جنگ بندی اور دونوں ممالک کے درمیان وسیع تر معاہدے کی راہ ہموار کرنا تھا۔
