اسلام آباد (پاک ترک نیوز )وفاقی حکومت نے موٹر سائیکل، رکشہ، چنگچی اور چھوٹی گاڑیاں استعمال کرنے والے شہریوں کے لیے خصوصی پیٹرول ریلیف اسکیم متعارف کرا دی۔
حکومت کے مطابق موٹر سائیکل، رکشہ اور چنگچی سمیت دو اور تین پہیوں والی سواریوں کے لیے ماہانہ 20 لیٹر پیٹرول پر 100 روپے فی لیٹر ریلیف دیا جائے گا۔
800 سی سی تک گاڑیوں کے مالکان کو ماہانہ 30 لیٹر پیٹرول پر 100 روپے فی لیٹر ریلیف فراہم کیا جائے گا۔
اس حساب سے دو اور تین پہیوں والی سواریوں کے صارفین کو ماہانہ زیادہ سے زیادہ 2 ہزار روپے جبکہ 800 سی سی تک گاڑی رکھنے والوں کو 3 ہزار روپے تک ریلیف مل سکے گا۔
حکومت کے مطابق اسلام آباد کی حدود میں اسکیم کا اطلاق پیر اور منگل کی درمیانی شب سے ہوگا، جبکہ پورے پاکستان، آزاد کشمیر اور گلگت بلتستان میں اس کا اطلاق بدھ اور جمعرات کی درمیانی شب سے کیا جائے گا۔
خصوصی ریلیف اسکیم کے لیے رجسٹریشن کا آغاز آج سے کر دیا گیا ہے۔
حکومت کا کہنا ہے کہ اسکیم کے طریقہ کار اور رجسٹریشن سے متعلق تفصیلات عوام تک آگاہی مہم کے ذریعے پہنچائی جائیں گی۔
