کراچی ( پاک ترک نیوز)بانیٔ پاکستان قائداعظم محمد علی جناح کی آج 78ویں برسی منائی جا رہی ہے۔ قائداعظم نے اپنی بصیرت، اصول پسندی اور بے مثال قیادت کے ذریعے تحریکِ پاکستان کی رہنمائی کی اور برصغیر کے مسلمانوں کے لیے ایک آزاد وطن کے حصول کی جدوجہد کو کامیابی سے ہمکنار کیا۔قائداعظم محمد علی جناح کی سیاسی جدوجہد نے برصغیر کی تاریخ کا دھارا بدل دیا۔ ان کی قیادت میں مسلمانانِ ہند نے اپنے سیاسی، سماجی اور معاشی حقوق کے لیے بھرپور جدوجہد کی اور بالآخر 14 اگست 1947 کو پاکستان دنیا کے نقشے پر ایک آزاد ملک کے طور پر ابھرا۔
یہ بھی پڑھیں: وزیراعظم شہباز شریف 20 ستمبر کو نیویارک جائیں گے
قائداعظم کی زندگی اصول پسندی، اتحاد، ایمان اور نظم و ضبط کا عملی نمونہ تھی۔ ان کی سیاسی بصیرت اور مضبوط عزم نے ایک منتشر قوم کو متحد کیا اور قیامِ پاکستان کی منزل حاصل کی۔قوم آج قائداعظم محمد علی جناح کی 78ویں برسی کے موقع پر انہیں خراجِ عقیدت پیش کر رہی ہے، جبکہ ان کی سیاسی جدوجہد، اصولی قیادت اور قومی خدمات آج بھی پوری قوم کے لیے مشعلِ راہ ہیں۔
