اسلام آباد(پاک ترک نیوز ) وزیراعظم شہباز شریف نے سعودی عرب میں حوثی حملوں کی شدید مذمت کرتے ہوئے سعودی عرب کی سلامتی، خودمختاری اور علاقائی سالمیت کے لیے پاکستان کی غیر متزلزل حمایت کا اعادہ کیا ہے۔
یمن کی حوثی جماعت انصاراللہ کی جانب سے سعودی شہروں ابہا، خمیس مشیط، نجران اور جازان میں حملے کیے گئے، جن میں شہری اور اقتصادی تنصیبات کو نشانہ بنایا گیا۔ حملوں کے نتیجے میں بچوں اور خواتین سمیت 73 افراد زخمی ہوئے۔
وزیراعظم شہباز شریف نے کہا کہ اس طرح کے حملے نہ صرف بے گناہ انسانی جانوں کے لیے خطرہ ہیں بلکہ علاقائی امن و سلامتی کو بھی متاثر کرتے ہیں۔
وزیراعظم نے خادم حرمین شریفین شاہ سلمان بن عبدالعزیز، ولی عہد محمد بن سلمان اور برادر سعودی عوام سے مکمل یکجہتی کا اظہار کرتے ہوئے کہا کہ پاکستان سعودی عرب کی خودمختاری، سلامتی اور علاقائی سالمیت کے لیے اپنی مستقل حمایت جاری رکھے گا۔
شہباز شریف نے حملوں میں زخمی ہونے والے تمام افراد کی جلد صحت یابی کے لیے بھی دعا کی۔
دوسری جانب دفتر خارجہ نے حوثی ملیشیا کے حملوں کو سعودی عرب کی خودمختاری اور علاقائی سالمیت کی کھلی خلاف ورزی قرار دیتے ہوئے کہا ہے کہ ایسے حملے پورے خطے کے امن اور استحکام کے لیے خطرہ ہیں۔
ترجمان دفتر خارجہ کے مطابق سعودی عرب کو اپنے علاقے، شہریوں اور رہائشیوں کے تحفظ اور قومی اثاثوں کے دفاع کے لیے تمام ضروری اقدامات کرنے کا مکمل حق حاصل ہے۔
پاکستان نے اقوام متحدہ کے چارٹر اور بین الاقوامی قانون کے مطابق سعودی عرب کے اس جائز حق کی مکمل حمایت کا اعادہ کیا ہے۔
دفتر خارجہ کے مطابق حوثی حملے یمن کے تنازع کے پُرامن اور پائیدار حل کے لیے جاری کوششوں کو بھی نقصان پہنچاتے ہیں۔
ترجمان نے کہا کہ پاکستان خطے میں پائیدار امن اور استحکام کے حصول کے لیے ہر ممکن کوششیں کرتا رہا ہے اور آئندہ بھی یہ کوششیں جاری رکھے گا۔
پاکستان نے سعودی قیادت، حکومت اور برادر عوام کے ساتھ مکمل یکجہتی کا اظہار کرتے ہوئے سعودی عرب کی خودمختاری اور علاقائی سالمیت کے لیے اپنی غیر متزلزل حمایت کا اعادہ کیا ہے۔
