اسلام آباد ( پاک ترک نیوز) زرعی شعبے میں جڑی بوٹیوں کے خلاف ایک نئی پیش رفت سامنے آئی ہے، جہاں ایف ایم سی اور کورٹِیوا ایگری سائنس نے نئی جڑی بوٹی مار دوا رِمِسواکسافن کی فراہمی اور لائسنسنگ کا معاہدہ کرلیا ہے۔
کمپنی کے مطابق نئی دوا مکئی اور سویابین کی فصلوں میں ایسی نقصان دہ اور مختلف ادویات کے خلاف مزاحمت پیدا کرنے والی جڑی بوٹیوں کو کنٹرول کرنے کے لیے تیار کی گئی ہے، جن میں پامر امارنتھ اور واٹر ہیمپ نمایاں ہیں۔
رِمِسواکسافن کو ہربیسائیڈ ریزسٹنس ایکشن کمیٹی نے فروری 2026 میں ایچ آر اے سی گروپ 12 اور 32 کے تحت دوہری موڈ آف ایکشن والی دوا قرار دیا تھا۔ کمپنی کے مطابق یہ ایچ آر اے سی کی تاریخ میں پہلی مرتبہ کسی ایک فعال کیمیکل کو دوہری موڈ آف ایکشن کی درجہ بندی دی گئی ہے۔ماہرین کے مطابق یہ دوا روایتی طور پر دو مختلف جڑی بوٹی مار ادویات کو ملا کر تیار کیا گیا پری مکس نہیں بلکہ ایک ہی فعال جزو ہے، جو جڑی بوٹیوں کے اندر دو مختلف حیاتیاتی اہداف پر اثر انداز ہوتا ہے۔
یہ بھی پڑھیں: موٹاپا کم کرنے والی ادویات کا اہم راز بے نقاب
رِمِسواکسافن پودوں میں فائٹوین ڈیسچیوریس (PDS) اور سولینیسائل ڈائی فاسفیٹ سنتھیز (SDPS) نامی دو اہداف کو متاثر کرتا ہے۔ ان دونوں راستوں میں خلل پڑنے سے متاثرہ جڑی بوٹیاں اپنا رنگ کھونے لگتی ہیں اور سفید یا زرد دکھائی دینے لگتی ہیں۔ایف ایم سی کے مطابق دوا کا دوہرا اثر جڑی بوٹیوں میں مزاحمت پیدا ہونے کے امکانات کے خلاف زیادہ مضبوط رکاوٹ فراہم کرسکتا ہے، تاہم اس کا اثر جڑی بوٹی کی قسم، نشوونما کے مرحلے اور کھیت کے حالات کے مطابق مختلف ہوسکتا ہے۔
یونیورسٹی آف گویلف کے ماہر زراعت پیٹر سکِیما کے مطابق دوہری موڈ آف ایکشن سائنسی اعتبار سے دلچسپ پیش رفت ہے، تاہم مزاحمت پر قابو پانے کا بنیادی اصول نیا نہیں۔ کسان پہلے ہی مختلف مؤثر موڈ آف ایکشن والی ادویات کو پری مکس یا ٹینک مکس کی صورت میں استعمال کرتے ہیں۔ماہرین کے مطابق نئی دوا کی عملی افادیت کا اندازہ اس کی قیمت، کارکردگی اور موجودہ پری مکس و ٹینک مکس ادویات کے مقابلے سے ہوگا۔
معاہدے کے تحت ایف ایم سی نئی دوا کے فعال جزو کی ملکیت برقرار رکھے گی اور اسے کورٹِیوا کو فراہم کرے گی۔ کورٹِیوا ابتدائی طور پر 20 کروڑ ڈالر پیشگی ادا کرے گی، جبکہ دونوں کمپنیاں شمالی اور جنوبی امریکا میں مکئی اور سویابین کے لیے خصوصی پری مکس مصنوعات تیار کریں گی۔ایف ایم سی نے 2026 میں اہم عالمی منڈیوں میں اس دوا کی منظوری کے لیے درخواستیں دینے کا منصوبہ بنایا ہے، جبکہ اس کی پہلی تجارتی فروخت رواں دہائی کے اختتام تک متوقع ہے۔
کمپنیوں کے مطابق رِمِسواکسافن کو شمالی اور جنوبی امریکا کی مکئی اور سویابین کی فصلوں کے لیے تیار کیا جارہا ہے، تاہم کینیڈا میں اس کی دستیابی کے بارے میں ابھی کوئی حتمی تاریخ نہیں دی گئی۔
