مظفرآباد(پاک ترک نیوز ) آزاد کشمیر قانون ساز اسمبلی میں نئے اسپیکر کے انتخاب کا مرحلہ مکمل ہوگیا، مسلم لیگ (ن) کے امیدوار چودھری طارق فاروق 32 ووٹ لے کر آزاد کشمیر اسمبلی کے 15ویں اسپیکر منتخب ہوگئے۔
اسپیکر کے انتخاب کے لیے ہونے والی ووٹنگ میں مجموعی طور پر 46 ارکان نے حصہ لیا۔ پیپلز پارٹی کے امیدوار چوہدری قاسم مجید نے 13 ووٹ حاصل کیے جبکہ ایک ووٹ مسترد ہوا۔
چوہدری طارق فاروق کی کامیابی کے بعد مسلم لیگ (ن) کو آزاد کشمیر اسمبلی میں اسپیکر کا منصب حاصل ہوگیا ہے۔
نومنتخب اسپیکر چوہدری طارق فاروق اپنے عہدے کا حلف اٹھائیں گے، قائم مقام اسپیکر چوہدری لطیف اکبر ان سے حلف لیں گے۔
ڈپٹی اسپیکر کے لیے مسلم لیگ (ن) نے احمد رضا قادری جبکہ پیپلز پارٹی نے عامر غفار لون کو امیدوار نامزد کیا ہے۔
پارٹی ذرائع کے مطابق چوہدری طارق فاروق اسپیکر منتخب ہونے کے بعد قائم مقام صدر آزاد کشمیر کی ذمہ داریاں بھی سنبھالیں گے۔
واضح رہے کہ مسلم لیگ (ن) کے قائد نواز شریف نے چوہدری طارق فاروق کو اسپیکر جبکہ احمد رضا قادری کو ڈپٹی اسپیکر کے امیدوار نامزد کرنے کی منظوری دی تھی۔
