تہران (پاک ترک نیوز ) پاکستان کے چیف آف ڈیفنس فورسز فیلڈ مارشل سید عاصم منیر کل ایران کے دارالحکومت تہران پہنچیں گے، ایرانی نیوز ایجنسی ایرنا کے مطابق دورے کے دوران وہ اعلیٰ ایرانی حکام سے ملاقاتیں کریں گے۔
ایرنا کے مطابق فیلڈ مارشل عاصم منیر کے دورۂ ایران میں دوطرفہ تعاون کے فروغ سمیت اہم علاقائی اور باہمی دلچسپی کے امور پر تبادلہ خیال کیا جائے گا۔
دورے کے دوران خطے میں امن و سلامتی اور مغربی ایشیا کی صورتحال بھی زیر بحث آنے کا امکان ہے۔ ایرانی نیوز ایجنسی کے مطابق فیلڈ مارشل عاصم منیر کا دورہ خطے میں استحکام کے لیے پاکستان کی سفارتی اور سیکیورٹی کوششوں کا تسلسل ہے۔
ایرنا کے مطابق پاکستان خطے میں امن و سلامتی کے فروغ کے لیے اپنی کوششیں جاری رکھنے کا عزم رکھتا ہے۔
گزشتہ روز ایرانی وزیر خارجہ عباس عراقچی نے بھی فیلڈ مارشل عاصم منیر سے ملاقات میں علاقائی صورتحال پر گفتگو کی تھی۔ ملاقات میں مغربی ایشیا میں امن و استحکام کے امور پر تبادلہ خیال کیا گیا۔
