واشنگٹن ( پاک ترک نیوز) امریکی صدر ڈونلڈ ٹرمپ نے ایران کے خلاف تباہ کن معاشی پابندیوں کا اعلان دیا ،امریکی صدر نے دنیا کے ممالک کو خبردار کیا ہے کہ ایران کو معاشی سہارا دینے کی صورت میں انہیں بھی سنگین اقتصادی نتائج کا سامنا کرنا پڑے گا۔
ٹرمپ نے اپنے سوشل میڈیا پلیٹ فارم ٹروتھ سوشل پر جاری بیان میں کہا کہ وہ ایران کے خلاف کسی بھی ملک کے خلاف اب تک کی جانے والی سب سے تباہ کن معاشی کارروائی کا اعلان کر رہے ہیں۔
امریکی صدر کے مطابق یہ اقدام دراصل اقتصادی جنگ اور ایران کو دنیا میں تنہا کرنے کی کارروائی ہے۔ انہوں نے اتحادی ممالک پر زور دیا کہ وہ امریکا کے ساتھ کھڑے ہوں اور ایران کو مکمل طور پر تنہا کرنے میں تعاون کریں۔
ٹرمپ نے خبردار کیا کہ جو ممالک اپنے مالیاتی اداروں، کاروباری اداروں، ہوائی اڈوں یا حکومتی اداروں کو ایران کے لیے مالی یا تجارتی لائف لائن فراہم کریں گے، انہیں شدید معاشی نتائج بھگتنا ہوں گے۔
انہوں نے ایران کے ساتھ تیل کی اسمگلنگ، نقد رقوم کی منتقلی، مالیاتی تبادلے، شپ رجسٹریشن اور فرنٹ کمپنیوں کے ذریعے ہونے والی سرگرمیوں کو فوری طور پر روکنے کا مطالبہ بھی کیا۔ٹرمپ نے کہا کہ متعلقہ ممالک جانتے ہیں کہ وہ کون ہیں، اور ان کے بقول یہ ’’اقتصادی ڈی ڈے‘‘ ہوگا۔ انہوں نے دعویٰ کیا کہ ایران کو مذاکرات کے لیے بہت سے مواقع فراہم کیے گئے لیکن تہران انہیں قبول کرنے میں ناکام رہا۔
یہ بھی پڑھیں: ایران کو ایٹمی صلاحیت سے روکنے کے لیے امریکا نے روسی ساختہ 21 جنگی طیارے خرید لیے
امریکی صدر نے مزید کہا کہ نئی معاشی پابندیاں ایران کو غیر معمولی طور پر تنہا کر دیں گی اور اسے عالمی سطح پر دہشت گردی پھیلانے کی صلاحیت سے محروم کر دیں گی۔ٹرمپ نے دعویٰ کیا کہ ایران کی بحریہ ختم، فضائیہ تباہ اور فوجی فیکٹریاں ملبے کا ڈھیر بن چکی ہیں، جبکہ ایرانی کرنسی بے وقعت ہو چکی ہے اور ملک انتہائی نازک صورتحال سے دوچار ہے۔
انہوں نے ایک بار پھر کہا کہ ایران کو جوہری ہتھیار حاصل کرنے کی اجازت نہیں دی جائے گی۔
