نئی دہلی ( پاک ترک نیوز) بھارت نے ملکی مارکیٹ میں چینی کی بڑھتی ہوئی قیمتوں کو قابو کرنے کے لیے 10 لاکھ میٹرک ٹن خام چینی ڈیوٹی فری درآمد کرنے کی اجازت دے دی۔
بھارتی وزارت تجارت کے نوٹیفکیشن کے مطابق شوگر ملز اور ریفائنریز اب 31 اکتوبر تک خام چینی بغیر درآمدی ڈیوٹی کے منگوا سکیں گی۔بھارت میں گزشتہ دو ماہ کے دوران چینی کی قیمتوں میں تقریباً 40 فیصد اضافہ ہوا ہے، جس کی بڑی وجہ ملکی پیداوار میں کمی اور رسد میں کمی بتائی جا رہی ہے۔
بھارت دنیا میں چینی استعمال کرنے والا سب سے بڑا ملک ہے اور تقریباً ایک دہائی بعد پہلی مرتبہ اسے چینی درآمد کرنے کی ضرورت پیش آئی ہے۔بھارت کی جانب سے ڈیوٹی فری درآمد کی اجازت کے اعلان کے بعد عالمی مارکیٹ میں چینی کی قیمتوں میں تیزی آگئی۔ لندن میں وائٹ شوگر کے بینچ مارک فیوچرز اور نیویارک میں خام چینی کے فیوچرز میں 4 فیصد تک اضافہ ریکارڈ کیا گیا۔
یہ بھی پڑھیں: بھارت کے لیے پاکستانی فضائی حدود کی بندش میں مزید ایک ماہ کی توسیع
بھارت اس وقت چینی کی درآمد پر 100 فیصد ڈیوٹی عائد کرتا ہے، تاہم نئے فیصلے کے تحت مخصوص مقدار میں خام چینی بغیر ڈیوٹی درآمد کی جاسکے گی۔ بھارت میں بندرگاہوں کے قریب قائم بعض شوگر ریفائنریز خام چینی درآمد کرکے اسے ریفائن کرنے کے بعد سفید چینی تیار کرتی ہیں، جسے عموماً برآمد کیا جاتا ہے۔
