اسلام آباد (پاک ترک نیوز )وزیراعظم محمد شہباز شریف سے ناروے کے وزیر خارجہ ایسپن بارتھ ایڈے نے وزیراعظم ہاؤس میں ملاقات کی، جس میں پاک ناروے تعلقات، تجارت، سرمایہ کاری اور علاقائی صورتحال پر تبادلہ خیال کیا گیا۔
وزیراعظم نے ناروے کے ساتھ دوستانہ تعلقات پر اطمینان کا اظہار کرتے ہوئے تعلیم، ہنرمند افرادی قوت، موسمیاتی تبدیلیوں سے نمٹنے اور ٹیکنالوجی کے شعبوں میں تعاون کو سراہا۔ وزیراعظم نے ناروے کی کمپنیوں کو پاکستان کے تیل و گیس کے شعبے میں سرمایہ کاری کی دعوت بھی دی۔
وزیراعظم نے فلسطین کے معاملے پر ناروے کے اصولی مؤقف کو سراہتے ہوئے خلیجی خطے میں امن کے لیے پاکستان کی کوششوں کی حمایت پر ناروے کا شکریہ ادا کیا۔
ناروے کے وزیر خارجہ نے پرتپاک استقبال پر وزیراعظم کا شکریہ ادا کیا اور ناروے کے وزیراعظم جوناس گہر سٹور کی نیک خواہشات پہنچائیں۔ انہوں نے علاقائی امن کے لیے پاکستان کے کردار کو سراہتے ہوئے دوطرفہ تعلقات مزید مضبوط بنانے کے عزم کا اظہار کیا۔
وزیراعظم شہباز شریف نے ناروے کے وزیراعظم کو پاکستان کا سرکاری دورہ کرنے کی دعوت بھی دی۔
