لاہور( پاک ترک نیوز) عید قرباں کے پہلے دن گھر گھر دعوتیں ، ، باربی کیو پارٹیوں اور خاندانی میل ملاقاتوں کا سلسلہ عروج پر پہنچ گیا۔۔۔ گھروں میں لذیذ پکوان تیار ہونے لگے، ، انگاروں پر تکے اور کباب سج گئے۔۔۔ جبکہ مہمانوں کی آمد نے ہر گھر کو خوشیوں سے بھر دیا۔
صبح نمازِ عید اور قربانی کے بعد شہریوں نے گوشت کی تقسیم کے ساتھ دعوتوں کی تیاریاں شروع کر دیں ۔ خواتین کچن میں مصروف رہیں جبکہ مرد حضرات قربانی کے گوشت کی تیاری، باربی کیو اور مہمانوں کے استقبال میں جُتے دکھائی دیے۔بریانی، قورمہ، کڑاہی، نہاری، کباب، چانپیں، تکے اور باربی کیو سمیت مختلف روایتی کھانوں کی خوشبوؤں نے پورے ماحول کو مہکا دیا۔۔ کئی علاقوں میں اجتماعی دعوتوں کا بھی اہتمام کیا گیا جہاں عزیز و اقارب اکٹھے ہو کر عید کی خوشیاں بانٹتے رہے۔
عید قرباں کے پہلے دن رشتہ داروں اور دوستوں کی آمد کا سلسلہ بھی جاری رہا۔۔۔ بچے عید قرباں پر بھی عیدی سمیٹتے رہے جبکہ بزرگ خاندانی محفلوں میں پرانی یادیں تازہ کرتے دکھائی دیے۔ کئی گھروں میں دور دراز سے آئے مہمانوں کیلئے خصوصی دعوتوں کا اہتمام کیا گیا، جہاں روایتی پاکستانی مہمان نوازی کے رنگ نمایاں رہے۔
شہروں میں فارم ہاؤسز، پارکس اور گھروں کی چھتوں پر باربی کیو پارٹیاں توجہ کا مرکز بن گئیں۔۔۔ نوجوان سیلفیاں اور وی لاگز بنا کر عید کی خوشیاں سوشل میڈیا پر شیئر کرتے رہے۔
دوسری جانب دیہی علاقوں میں بھی دیسی انداز کی دعوتوں نے عید کا لطف دوبالا کر دیا۔۔۔ کہیں مٹی کے چولہوں پر گوشت پکایا گیا تو کہیں کھلے میدانوں میں اجتماعی کھانے کا اہتمام کیا گیا۔
ماہرین کے مطابق عید قرباں صرف جانور کی قربانی کا نام نہیں بلکہ محبت، ایثار، خاندانی رشتوں اور خوشیوں کو بانٹنے کا تہوار بھی ہے۔۔۔ یہی وجہ ہے کہ پاکستانی معاشرے میں عید کے پہلے دن دعوتوں اور مہمان نوازی کی روایت کو خاص اہمیت حاصل ہے۔
