حکومت کا تاریخی اقدام، ملک میں پہلی فیری سروس لائسنس کی منظوری دے دی گئی

اسلام آباد ( پاک ترک نیوز) وفاقی وزیر بحری امور محمد جنید انوار چوہدری کی کوششوں سے تاریخی پیش رفت سامنے آئی ہے جب کہ وزارت بحری امور نے فیری سروس لائسنس کی اصولی منظوری دے دی۔
سی کیپرز کو ایران اور خلیجی ممالک کے لیے فیری لائسنس کی منظوری دی گئی، برطانیہ میں قائم کمپنی ’سی کیپر‘ پاکستان کو ایران اور خلیج تعاون کونسل (جی سی سی) کے ممالک سے ملانے کے لیے فیری روٹس چلائے گی۔
فیری آپریٹرز کی درخواستیں 2017-18 سے زیر التوا تھیں، ان درخواستوں پر تیزی سے کام کرتے ہوئے میری ٹائم امور کی وزارت نے بین الاقوامی فیری آپریٹر کو پہلی فیری سروس لائسنس کی منظوری دی۔
وفاقی وزیر بحری امور جنید انوار چوہدری نے کہا کہ آج بحری رابطے کی نئی تاریخ رقم ہوئی ہے، فیری سروس سے زائرین اور مزدوروں کو سستا سفر میسر ہوگا۔
جنید انوار چوہدری نے کہا کہ کراچی اور گوادر سے فیری سروس کا آغاز ہوگا، سمندری سفر محفوظ، آرام دہ اور قابلِ استطاعت بنایا جائے گا۔
وفاقی وزیر بحری امور نے کہا کہ پاکستان کی سمندری معیشت کو فروغ ملے گا، فیری سروس سے علاقائی سیاحت اور تجارت کو فروغ ملے گا، فیری سروس شروع کرنے کے لئے کوششیں تیز کر دی ہیں۔