اسلام آباد (پاک ترک نیوز) وزیراعظم کی سعودی عرب کے ولی عہد شہزادہ محمد بن سلمان سے گفتگو ہوئی ہے۔
وزیر اعظم محمد شہباز شریف نے آج صبح سعودی عرب کے ولی عہد اور وزیر اعظم عزت مآب شہزادہ محمد بن سلمان بن عبدالعزیز السعود سے ٹیلی فون پر بات چیت کی۔
اپنی گرمجوش اور خوشگوار گفتگو کے دوران وزیراعظم نے خادمین حرمین شریفین عزت مآب شاہ سلمان بن عبدالعزیز آل سعود، ولی عہد شہزادہ اور سعودی عرب کے برادر عوام کو عید الفطر کی دلی مبارکباد پیش کی ۔ سعودی ولی عہد عزت مآب شہزادہ محمد بن سلمان نے بھی وزیراعظم کو عید کی مبارکباد دی اور نیک خواہشات کا اظہار کیا ۔
وزیراعظم نے سعودی عرب پر حالیہ حملوں کی پاکستان کی شدید مذمت کا اعادہ کیا اور ایک بار پھر اس مشکل وقت میں مملکت اور اس کے عوام کے لیے پاکستان کی مکمل یکجہتی اور حمایت کا اظہار کیا۔ موجودہ بحران میں غیر معمولی تحمل کا مظاہرہ کرنے پر مملکت کی قیادت کو سراہتے ہوئے وزیراعظم نے سعودی قیادت کو یقین دلایا کہ پاکستان ہمیشہ مملکت اور سعودی عرب کے برادر عوام کے ساتھ کھڑا رہے گا، اسی طرح جس طرح انہوں نے ہمیشہ پاکستان کی حمایت کی ہے۔ وزیراعظم نے فوری طور پر جنگ کے خاتمے اور معمول پر آنے پر زور دیا تاکہ علاقائی صورتحال کو مستحکم کیا جا سکے۔ انہوں نے امت کی صفوں میں اتحاد اور ہم آہنگی پر زور دیا جس کی پہلے سے زیادہ ضرورت ہے۔ انہوں نے سعودی ولی عہد کو تمام فریقین تک پاکستان کی تعمیری سفارتی رسائی کے بارے میں آگاہ کیا جس میں کشیدگی کو کم کرنے اور اختلافات کو مذاکرات اور سفارت کاری کے ذریعے حل کرنے پر زور دیا گیا ہے۔
سعودی ولی عہد نے پاکستان کی امن کوششوں کو سراہا۔ دونوں رہنماؤں نے دونوں ممالک کے درمیان ہر سطح پر قریبی رابطہ برقرار رکھنے پر اتفاق کیا۔
وزیراعظم کی سعودی عرب کے ولی عہد سے گفتگو
