خیبر پی کے میں کل سے 30مارچ تک بارش اور برفباری کی پیشگوئی

پشاور ( پاک ترک نیوز) خیبر پختونخوا کے بیشتر اضلاع میں 25 سے 30 مارچ کے دوران تیز ہواوں اور گرج چمک کے ساتھ بارش کی پیشگوئی۔ موسمی صورتحال کے پیش نظر پی ڈی ایم اے نے تمام ضلعی انتظامیہ کو پیشگی اقدامات کے لئے الرٹ جاری کر دیا۔
پی ڈی ایم اے کا کہنا ہے کہ صوبہ میں 24 مارچ کی رات مغربی ہواؤں کا سلسلہ داخل ہو کر 31 مارچ تک برقرار رہنے کا امکان ہے۔
اس دوران صوابہ کے بالائی اضلاع چترال، سوات، دیر، کوہستان، مانسہرہ، ایبٹ آباد سمیت متعدد اضلاع میں بارش اور پہاڑوں پر برفباری متوقع ہے۔
اسی طرح پشاور، مردان، چارسدہ، نوشہرہ، کوہاٹ، کرم اور وزیرستان سمیت میدانی علاقوں میں بھی بارش اور تیز ہوائیں چلنے کا امکان ہے۔
28 سے 30 مارچ کے دوران صوبہ بھر میں وقفے وقفے سے تیز بارشوں جبکہ بعض مقامات پر ژالہ باری کا بھی امکان ہے۔
پی ڈی ایم اے کا کہناہے کہ شدید بارشوں کے باعث مقامی ندی نالوں میں طغیانی اور فلیش فلڈ کا خطرہ ہے۔پہاڑی علاقوں میں لینڈ سلائیڈنگ کا خدشہ ہے ، سیاحوں کو غیر ضروری سفر سے گریز کی ہدایت بھی کی گئی ہے ۔
تیز ہواؤں اور آسمانی بجلی سے کمزور عمارتوں، بجلی کے کھمبوں اور سولر پینلز کو نقصان کا اندیشہ ہے۔پی ڈی ایم اے نے ضلعی انتظامیہ کو الرٹ رہنے اور پیشگی اقدامات کرنے کی ہدایت جاری کر دی۔
ریسکیو 1122 اور دیگر اداروں کو ہنگامی صورتحال سے نمٹنے کے لیے تیار رہنے کی ہداہت بھی جاری کی گئی ہے ۔شہریوں کو محفوظ مقامات پر رہنے اور بارش کے دوران احتیاطی تدابیر اختیار کرنے کی بھی ہدایات جاری کی گئی ہیں ۔
ترجمان پی ڈی ایم اےکا کہنا ہے کہ پی ڈی ایم اے کا ایمرجنسی اپریشن سنٹر مکمل طور پر فعال ہے۔ عوام کیس بھی ناخوشگوار واقعے کی اطلاع ہیلپ لائن 1700 پر دیں۔